Read Makhuwa-Shirima Yobi 7 Bible Online

Yobi 7 - Makhuwa-Shirima bible

Yobi 7

¹Okumi wa khula mutthu mulaponimu ti woovihaxa, omviriha mahukwaawe ntoko namaliviwa.

²Mooteene yoowo epottha enghaawelaaya wiila, hoye hoye namaliviwa onghaawelaawe, awehereraka oliviwa,

³hiihotho koovaheriwa okhala nyeeri nyeerisene kiwehereraka siiyo ni ohiyu, ohiyuweene kihaawaka.

⁴Kiixaatalelaka kinuupuwela: Nkivenye yaakhani? Opisa oxa, ni kinkhulumuwa orukunuwasa mpaka oxeexelo.

⁵Erutthwaaka yoosareya nyuungu ni makangaru a nikhwatta, exapalaaka yoothaleyasa ekhumaka marohi.

⁶Mahukwaaka antthimaka opwaha yootthavano ya namatthava, ni amphiya ommaleloni woohiwehereraru.

⁷Ii! Muluku, muupuwelele weera okumaaka onlikana ni iphumu; maithwaaka kheerwa yoonatho mpuha.

⁸Yaawo ankoona vano, kheekoonatho; mookiweha, mene nkiwowo.

⁹Mooteene yoowo nihutte nimmwaramwareyaaya, nnalakaseya, navetho yoowo onkhwa khanghokolowatho.

¹⁰Khanghokoleelatho owannyawe; khaawo a vaatevawe eniimusuweletho.

¹¹Tivawo kihimmaalaaka; moothananani wa munepaaka kinimuuluma nnenesene, moohaawani wa munepaaka kinimwiittaandawulela.

¹²Miyo ephareiya, hoye hoye enowa yoowoopihaxa ya moowiixera, weera mukiwehawehe?

¹³Kuupuwelaka weera ekaamaaka enookipepesa ni weera wiixaatalelawaka onookurunuxa ottaandawulawaka,

¹⁴hata vawo, munkitutuxa ni sooloha mukoopopihaka ni nyoonelo.

¹⁵Fataari okhumuliwa nxiko ni okhwa ohikhanle ohaawa hiiha.

¹⁶Nkinoonelamo okumaaka! Nkinkhala mahuku ootheene; mukihiye, niwoko mahukwaaka khaveetthuwo.

¹⁷Mutthu taani oomoonelamo ni oompwattha,

¹⁸aani taani mutthu oongwehaweha khula oxeexelo ni oomoota murima khula ehuhu?

¹⁹Khamurwa mukihuluwaru? Khamurwa mukihiya meekhaaka naari ehuhu emoha?

²⁰Kaatthenke, yoonanara heeni koopakenlaakani, Muluku, munaawehaweha atthu? Mukitatuxenreni yoolupaanyu? Weeraka koothatuwa yoolemelaanyu?

²¹Muhinlevelelela heeni sooveihasaka ni muhincipiherani sootthekasaka? Vano kihanle vakhaani wiixaatalela vantthupini; Nyuwo munookaasa, mene miyo nkikhalatho.”