Read Makhuwa-Shirima Yobi 9 Bible Online

Yobi 9 - Makhuwa-Shirima bible

Yobi 9

¹Vano Yobi aahaakhula:

²“Koosuwela weera eyo ettiitthu. Vaheera anaawere hai onkhwa okhala ookwanela vamaithoni wa Muluku?

³Naari aatthuneene omwaakhulanano, khaaweraru waakhulela.

⁴Mirukusawe ti soowiixera, owerawawe ti otokotoko. Taani eerenre ongwanano, sinamweettela nnene?

⁵Owo onttuutta nyaako iyo sihisuwelaka, ni musaranimwawe onoopopheya.

⁶Ookukuttha etthaya, anathaamiha vanipuroniwaya, ni onthukumeliha mattumuxaaya.

⁷Onuuluma ni nsuwa ni nno khannoopa; Owo oniipithiha waara wa ithenyeeri.

⁸Owo paahi onkunga irimu ni oneetta vasulu wa mitekuteku sa ephareiya.

⁹Owo Mpattuxa a Ursu* ni Oriyoni*, a mikuttula sa ithenyeeri ithannapiili ni mikuttula sa ithenyeeri sa mpatta wa ohitto.

¹⁰Ompaka miiriira sihinthaliheya, sootikhiniha soohaalikeleya.

¹¹Aaviraka wa miyo, nkingwera omoona; avira mukhivirumwaka nkinimusuwela.

¹²Owo aphwanya etthu, taani eniimweemexe. Taani anaamweerele: ‘Mumpakani?’

¹³Muluku khankurunuxa isarasawe; mpaka anamakhavihera a Rahabe anuuramela inaawosawe.

¹⁴Vano, nkiwere hai omwaakhulanano? Nkiphwanye hai masu oomwaakhulanano?

¹⁵Kiroohikhalanaru nthowa, miyo nkaawera omwaakhula; kaaheereke paahi omudyoonttelela ikharari Mphukaaka.

¹⁶Naari kimwiitthanneene ni Owo akaakhunleene, nkinroromela weera aamukiiwa.

¹⁷Owo aamukittikittha ni ettheku ni woohinthowa aamwaandyeerera makhwattaaka.

¹⁸Khaakitthunihera okhala ni okumi, mene aamukiikaathi moohireerela.

¹⁹Wakhala mwaha wa ikuru, vano Owo ti ooweraxa! Ni wakhala mwaha wa ekhaikhai, vano taani eniimulamulele

²⁰Naari kihikhanleno nthowa, eyanowaaka yaamukithoriha; kaari ookwanela, eyo yaamukeerela kookhalano nthowa.

²¹Naari kireene ookwaneleene, nkiniipwatthela; kinnyoosa okumaaka.

²²Sootheene emohamoharu; tivawo kineeraaka Owo onimphwata okhuma ookwanela mpaka mutakhali.

²³Nihooxo niivaka wootutuxereya, Owo ontthebwa ohiweherera wa oohinthowa.

²⁴Elapo yaamorelaka mmatatani mwa atakhali, Owo onkuttelela maitho a aphuki. Aahikhala Yoowo, anaakhale taani?

²⁵Mahukwaaka antthimaka ompwaha namatthimaka, mahuku ammala ehoonneru ohakalala.

²⁶Anlakaseya ntoko nikula na ettiili, ntoko xaaka amorelaka yoovaraawe.

²⁷Miyo keera: ‘Kinoottiwala wiittaandawulelawaka ni kinooceendya ekhovaaka kitheyeke,’

²⁸hata hiiho, kintteenguwa moohaawanimwaka wootheene niwoko koosuwela weera khamukoona ohikhalano nthowa.

²⁹Keenre kooneliwa okhala nanthowa, kaahiwanele heeni siiyoweene?

³⁰Naari kiirapingheene ni sabawu, kinyangweene,

³¹Nyuwo mwaankivonyera muhimeni mwa nttoko weera mpaka ikuwosakasene sikithanye.

³²Owo khahiyono mutthu ntoko miyo weera kingwaneno munuulummwa milattu.

³³Aari mukina paahi weera anilakelele, ni aniikaathere matata hiyo ooweeli,

³⁴mukina aakisusinghe wa ekopo ya Muluku weera woopihawawe ohikoopopihetho!

³⁵Vano miyo kaamuuluma woohoova; vaheera mmwahani ola, wookivirikaneela.”