Read Makhuwa-Shirima Icipo 10 Bible Online

Icipo 10 - Makhuwa-Shirima bible

Icipo 10

¹Nivekelo wa ovuluxiwa. Yave, murakamelenleni? Muniivithavithelani mweehuhuni ya makacamiho?

²Ngwiixoonanimwawe mutakhali onimuttharatthara oohilipa, mwa yoowo ompharihiwa munraakhonimwawe mwa soovaanelasawe.

³Mutakhali onlapa soohaawelasawe; owo onimureeliha namilili, anamukhootta Yave.

⁴Ngwiixoonanimwawe mutakhali khammwaasa Yave; mwa soowuupuwelasawe sootheene khanimpwattha Muluku.

⁵Mahuku ootheene owo sinnamweettela nnene; ti oowiixoona ahipwatthaka Nlamulonanyu, anaaramusa amwiittanaawe ootheene.

⁶Owo oniixeerela: “Kheewowo eneera ekittikinye; kinoohakalala oohakalaleene wa mahuku ootheene kihikhalanaka sookacamiha.”

⁷Eyaanowaawe yoosareya soolapha, soowootha ni soowoopopiha; sookacamiha ni soonanara siri vanluminiwawe.

⁸Onimwiipitha vakhiviru wa mittetthe ni vanipuroni nenenenne oniwiiva yaawo oohinthowa aathurumelaka muxiirini yaale eneera evire.

⁹Onimwiipitha ntoko mwatto; ongweherera weera amvare oohaawa. Onimvara oohaawa, anamupurulela mutthavinimwawe.

¹⁰Yoovaraawe onookakhela vatthayani, enamorela vathi niwoko na ikurusawe.

¹¹Oniixeerela: “Muluku oottiwala — Owo ohiipithiha ekhovaawe ni kharwa oona yeela.”

¹²Mvenye Yave! Ii! Muluku, mweemexe ntatananyu! Muhaattiwale atthu oohaawa.

¹³Mutakhali onimuruwanelani Muluku? Heeni oniixeerelaawe: “Owo kheewo aneeraawe akipakele”?

¹⁴Wa soothesene, Nyuwo, Muluku, munnoona sookacamiha ni soohooxa. Munnoona seiyo, munakosoopa. Yoovaraawe mutakhali eniixinnyerera wa Nyuwo; Nyuwo ti Namwaakiha a akwaasuni.

¹⁵Mwintake moono wa mutakhali; munthorihe niwoko na soonanarasawe mpaka omalamala khuluwi.

¹⁶Yave ti Mwene wa mahuku ootheene! Miloko sinoolakaseya mweelaponimwawe.

¹⁷Ii! Yave, mohiiwa soovekela sa oohooxiwa; Nyuwo munaapepesa munawaakhulela.

¹⁸Mungwaakiha akwaasuni ni oohasuliwa weera mutthu ongweherera okhwa ahihokoleele woopopiha.