Read Makhuwa-Shirima Icipo 102 Bible Online

Icipo 102 - Makhuwa-Shirima bible

Icipo 102

¹Nivekelo na mutthu oohooxiwa ori oohilipaxa ni ommoonihera Yave olalamikawawe. Mwiiwe nivekelonaka Yave; okhuwelelawaka ekhavihero woophiyereni.

²Muhikihuluwe miyo kaakhalaka moohaawani. Mukiiweke ni kaakhuwelaka, mukaakhuleke woowaakuveya.

³Vano mahukwaaka anlakaseya ntoko mwiixi; makhuvaaka anza ntoko makhala a mooro.

⁴Murimaaka ti woopheepuwa ni woowuuma ntoko malaxi; mpaka kinnattiwala oca.

⁵Niwoko na wiipulelawaka kihanle makuvaru.

⁶Kiri ntoko esiisi ya munikareni; ntoko esiisi eriyari ya mathala.

⁷Nkingwera okona; kiri ntoko mwaapalame meekhaawe ari vampani.

⁸Ehuhu yootheene amwiittanaaka annakitthebwa; yaale ankiruwana amvarela muteko nsinanaka weera elapheno.

⁹Vano kinca ettuura ntoko yoocaaka ni yoowuraaka entakansereya ni maithori,

¹⁰niwoko na isarasanyu sitokotoko mweenre mukikhootta munakoomolela ottaiwanyu.

¹¹Mahukwaaka ari ntoko munttuusi wa oxekuwa; kimpheepuwa ntoko malaxi.

¹²Vaheera Nyuwo, Yave, munkilaathi vahiceni ya emwene wa mahuku ootheene; epilaanyu empwaherera wa ikhapira sootheene.

¹³Munoovenya, mmorelaka ikharari oSiyoni, niwoko yoophiya ehuhu yoomoonihera murimaanyu wooreera; yoophiya ehuhu yootthuneya.

¹⁴Vano malukwaaya anaasiveliha arumeiyaanyu; mathalaaya antannya ikhararisaya.

¹⁵Miloko sootheene sinimoova Nsina na Yave; mamwene ootheene a elapo anoottittimiha ovuwawanyu.

¹⁶Yave onoorasela oSiyoni ni onimwiixoonihera moovuwanimwawe.

¹⁷Owo onaakhula nivekelo na oowiixeetta; khanramusa wiidyoonttelelawaya.

¹⁸Seiyo silepeliwe ikhapira sa muhoolo weera muloko ohinaaye okhala omuttottopele Yave olaleiyaka:

¹⁹“Yave onoona vanipuroniwawe nootteela na osulu; ongwehaweha elapo ya vathi areene wiirimu

²⁰weera iiwe ottaandawula wa ootthukiwa ni aataphule athoriheliwe okhwa.”

²¹Hiiho Nsina na Yave nnoolaleiwa oSiyoni ni ottottopeliwawawe oYerusaleemu,

²²miloko ni omwene waathukumanaka weera omulape Yave.

²³Eriyari ya okumaaka, Owo oomaliha ikurusaka; Owo oovukula mahukwaaka.

²⁴Vano kaavekela: Ii! Mulukwaaka, muhikivenxe eriyari ya mahukwaaka. Mahukwaanyu ampwaherera wa mahuku ootheene.

²⁵Ompacereroni mwaakhaliha mathipelo a elapo ya vathi ni wiirimu woopakiwa ni matataanyu.

²⁶Awosa anooriheya, mene Nyuwo munoopwaherera okhala; ootheene animuuluvala ntoko ikuwo; munimwaaceendya ntoko ikuwo ni anoovonyeriwa okerekhere.

²⁷Vaheera Nyuwo munookhala oohiceendyeya ni iyaakhasanyu khasimmala.

²⁸Anamwane a arumeiyaanyu anookhalano woomakawo; ikhapirasaya sinootekihiwa vamaitoniwanyu.