Read Makhuwa-Shirima Icipo 103 Bible Online

Icipo 103 - Makhuwa-Shirima bible

Icipo 103

¹Ecipo ya Davide. Ii! Okumaaka, munttottopele Yave; okumaaka wootheene, muttottopele Nsinanawe Nootteela!

²Ii! Okumaaka, munttottopele Yave ni muhittiwale sookipakelasawe sootheene,

³mwa Yoowo onlevelela sootthekasanyu sootheene ni onlamiha irettasanyu sootheene.

⁴Owo onoopola okumaanyu mmahiyeni ni onootthukani ecireemba ya osivela ni ikharari.

⁵Owo onkwanihera okhalawanyu ni itthu sooreerela moota wooweera omiravowaanyu othatuwe onyowani ntoko wa xaaka.

⁶Yave ongwoonihera oohasuliwa ootheene ekhaikhai ni ororomeleya.

⁷Aamusuweliha Moisesi iphirosawe ni mitekosawe wa muloko wa aYixrayeli.

⁸Yave ti a ikharari ni a murima wooreera; Owo ti oopisa onyoonyiwa ni oosareya osivela.

⁹Owo khanoothera wa mahuku ootheene hata khampwaherera okhala oonyoonyiweene.

¹⁰Owo khannipakela attharihaka sootthekasahu hata khannihokoloxera sootakhalasahu.

¹¹Vano mooteene yoowo erimu erakamelannaaya ni elapo ya vathi, hiihotho ti waasivelawawe yaale ammoova.

¹²Owo onnirakameliha sootthekasahu ntoko orakamelanawaya ninkhuma nsuwa ni ninkela nsuwa.

¹³Yave onaamorela ikharari yaale ammoova ntoko tiithi onaamorelaawe ikharari anamwanaawe.

¹⁴Vano Owo oosuwela moota nipakiwaahu ni weera hiyo nri ntthupi.

¹⁵Vano mwaha wa mutthu — ori ntoko malaxi; owo onttuva ntoko ethutu ya ntuphini;

¹⁶yoopaka epheyo, eyo emvavihiwa, ehinooneya nipuro yaattuvalaaya.

¹⁷Vaheera osivela woororomeleya wa Yave ori woohimala wa yaale ammoova ni ekhaikhaiyaawe eri ni anamwane a anamwanaaya,

¹⁸yaale antthara wiiraanawawe ni anuupuwelela wiiwelela ikanosawe.

¹⁹Yave ookhaliha ehicaawe ya emwene wiirimu ni omwenaawe onlamula soothesene.

²⁰Andyelo nyuwosa, munttottopele Yave; nyuwosa ooweraxa muniiwelela maswaawe.

²¹Anakhotto a wiirimu nyuwosa, munttottopele Yave, nyuwosa arumeiyaawe mumpaka otthunawawe.

²²Mitekosawe sa mapuro ootheene moomwenenimwawe, munttottopele Yave. Ii! Okumaaka, munttottopele Yave!