Read Makhuwa-Shirima Icipo 108 Bible Online

Icipo 108 - Makhuwa-Shirima bible

Icipo 108

¹Ecipo ya Davide. Ii! Muluku, murimaaka ori woolipeene; kinimwiipa ni kinoottottopela ni okumaaka wootheene.

²Mvenyeke makita ni lira*! Miyo kinoovenya engweengweengwe.

³Ii! Yave, kinimoottottopelani variyari wa miloko; kinimwiipa sa Nyuwo variyari wa seiyo,

⁴niwoko osivelawanyu woororomeleya omphiya mpaka vasulu erimu ni ororomeleyawanyu omphiyera mmahutteni.

⁵Mvuwihiwe Muluku osulu erimu; ovuwawanyu okhaleke mweelaponi yootheene.

⁶Munivuluxe ni munikhavihere ni ntatananyu noolopwana weera yaale munaasivelaanyu yoopoliwe.

⁷Muluku aahuuluma vaNipuroniwawe Nootteela*: “Moowinanimwaka kinookawanya oXekhemi ni kinooringa nreyareya na oSukota.

⁸oGiliyade ti wawaka ni hiihotho oManaxe; wEfrayimi ti ekapaseetaaka; oYuda ekopowaaka ya emwene.

⁹oMowabe ti ebasiya kinsuusulelaaka, wEdomi kimvonyerawo ikwakwaattasaka; oFilistiya kinkhuwelelawo owinawaka.”

¹⁰Taani anaakihoole esidade yoolipihiwa? Taani anaakironghe wEdomi?

¹¹Vekhaikhai ti Nyuwo Muluku, munikhoontte ni moohiya waahoola anakhottwaahu.

¹²Munikhavihere waawanano amwiittanaahu niwoko ekhavihero ya atthu kheemuteko.

¹³Kinoowina ni ekhavihero ya Muluku ni Owo onimwaanyikalela amwiittanaahu.