Read Makhuwa-Shirima Icipo 109 Bible Online

Icipo 109 - Makhuwa-Shirima bible

Icipo 109

¹Wa muhusiha a icipo. Ecipo ya Davide. Ii! Muluku, mwa Yoowo kinimutthapelaaka, muhimaale,

²niwoko atakhali ni anamootha ankuulumela, ekootheraka ni malumi oowootha.

³Aakirica ni masu oosareya othanya; ankiwanano miyo kihinthowa.

⁴Awosa ankoothera ehiyaka onthamwenaaka, mene miyo kimpwaherera mmavekeloni.

⁵Awosa anaakakhanyiha yooreera ni yoonanara ni onthamwenaaka ni othanya.

⁶Awosa aneera: “Munthanle mulopwana oonanara weera amoothere; namoothera eemeleke moonowaawe woolopwana.”

⁷Omulattuni ooneye weera nanthowa ni mpaka mavekelowaawe yooniwe weera yoottheka.

⁸Mahukwaawe a okumi ekhale vakhaani; mukina amurandele ntoko muhooleli.

⁹Anamwanaawe ekhaleke akwaasuni ni mwaariye akhaleke naamukhweli.

¹⁰Anamwanaawe yaase weetta ekhalaka anamavekela; yoomolasiwe owaani eheleyaka nthala.

¹¹Namakoongoriha avareke sooreelasawe sootheene; anamarwa ehuhule soowiima sa mutekwaawe.

¹²Ahikhaleru anaamoonihere murima wooreera hata anaamorele ikharari anamwanaawe akwaasuni.

¹³Ekhapiraawe ephwatiwe; masinaaya emalamalihiwe wa ikhapira sa muhoolo.

¹⁴Sootakhala sa asitithawe suupuweleliweke vamaithoni wa Yave; soottheka sa amayawe sihittiwaliweke!

¹⁵Sootthekasaya sikhaleke vamaithoni wa Yave mahuku ootheene ni mweelaponi ahikhaleru anuupuweleletho emusaawe.

¹⁶Niwoko owo khuupuwela opaka yooreera, mene aahaattharatthara mpaka okhwa oohaawa, oothoiwa ni oothananaxa.

¹⁷Owo onsivela olapha — olapha iwo ommorele; khaatthunne nreeliho — nno nikhaleke ottaiwawe!

¹⁸Aawara nlapho ntoko ekuwo; nlapho nno noovolowa mweerutthunimwawe ntoko maahi, mmakhuvani ntoko makhura.

¹⁹Nno nimvitikelele ntoko mukaandyo; nimunine ntoko laamba wa mahuku ootheene.

²⁰Itthu sootheene iya sikhaleke soowaalivela Yave yaale ankoothera; yaale ankuuluma.

²¹Vaheera Nyuwo, Yave munlamula sootheene, mukipakele sooreera; mukivuluxe niwoko na osivelawanyu wooreeraxa.

²²Vano miyo oohaawa ni oothoiwa ni murimaaka woothananaxa.

²³Miyo kinlakaseya ntoko munttuusi wooxekuwa; kintathiwa ntoko musoope.

²⁴Makuthaaka aatteenguwa niwoko na otthukawaka; erutthwaaka yooyavayava ni woonda.

²⁵Kootthebwiwa ni anamoothera; awosa yaakoonaka, ankipukunyera muru.

²⁶Ii! Yave Mulukwaaka, mukikhavihere; mukivuluxe niwoko na osivelawanyu!

²⁷Awosa esuwele weera ti ntatananyu; weera ti Nyuwo mpanke.

²⁸Onoowereya awosa olapha, mene Nyuwo munooreeliha; awosa yaawanaka; anooyevihiwa, vaheera murumeiyaanyu onoohakalala.

²⁹Anamootheraaka waasareye wuulihiheya muru; ekhuneeliweno ntoko mukaandyo.

³⁰Kinoomvuwiha Yave ni eyanowaaka; kinoomuttottopela variyari wa atthu ancipale.

³¹Vano Owo ti Namwaakiha a mutthu oohaawa weera amvuluxe mwa yaale animuthoriha.