Read Makhuwa-Shirima Icipo 110 Bible Online

Icipo 110 - Makhuwa-Shirima bible

Icipo 110

¹Ecipo ya Davide. Yave onimweerela pwiiyaaka: “Mukilaathi moonowaaka mulopwana mpaka kineeraaka kiwiikaathi amwiittanaanyu vathi wa inaawosanyu.”

²Yave onimookolela ekopowaanyu ya emwene okhuma oSiyoni; nyuwo munoolamula eriyari ya amwiittanaanyu.

³Anakhottwaanyu anookhalano murima woolipa vanihukuni na ekhotto, ewarenleene soowara sootteela; okhuma oxeexelo amirawaanyu anoothukumana wa nyuwo ntoko nikame.

⁴Yave aalipela ni kharwa aceendya soowuupuwelasawe: “Nyuwo ti Mutokweenexa a asaserdoti* mahuku ootheene mmukhaleloni mwa Melkhisedeki.”

⁵Yave ori moonowaanyu woolopwana; Owo onimwaaphwata mamwene vanihukuni na isarasawe.

⁶Owo onoothoriha miloko awaandyeereraka ookhwa ni aaphwataka anamalamula a elapo ya vathi.

⁷Owo onoowura maahi a munxaapwani mukerekhere mphironi ni vano onimweemwexa muru.