Read Makhuwa-Shirima Icipo 111 Bible Online

Icipo 111 - Makhuwa-Shirima bible

Icipo 111

¹Munttottopele Yave. Kinoomvuwiha Yave ni murimaaka wootheene mmuthukumanoni wa oororomeleya.

²Miteko sa Yave ti sitokotoko; ootheene ansivela seiyo anootthokelela.

³Soopakasanyu ti soovuwiheya ni soowaaraxa ni ororomeleyawanyu ompwaherera wa mahuku ootheene.

⁴Owo khannihiya nittiwalaka sootikinihasawe; Yave ti a ikharari ni a murima wooreera.

⁵Owo onaavaha yooca yaale animoova; Owo onuupuwelela wiiraanawawe wa mahuku ootheene.

⁶Owo ohoonihera mulokwaawe ikuru sa mitekosawe avahaka ilapo sa miloko sikina.

⁷Miteko sa matataawe ti soororomeleya ni sa ekhaikhai; ikanosawe sootheene soophwanela ororomela.

⁸Seiyo siri soolipasene wa mahuku ootheene ni sikhalihiwe ni ororomeleya ni wookoleleya.

⁹Owo ooruuhela ovuluwa mulokwaawe; Owo ookhaliha wiiraanawawe wa mahuku ootheene — Nsinanawe ti nootteela ni noowooveya.

¹⁰Omoova Yave ti epacerero ya miruku; ootheene antthara ikanosawe ari a wiiwexexa nnenesene. Wa Yoowo okhale ottottopela woohimala.