Read Makhuwa-Shirima Icipo 118 Bible Online

Icipo 118 - Makhuwa-Shirima bible

Icipo 118

¹Muntthapele Yave niwoko Owo ti ooreera murima; osivelawawe khoommala.

²oYixrayeli weere: “Osivelawawe khoommala.”

³Asaserdoti* yeere: “Osivelawawe khoommala.”

⁴Yaale ammoova Yave yeere: “Osivelawawe khoommala.”

⁵Moothanananimwaka kaamukhuwelela Yave ni Owo aakaakhula anakivuluxa.

⁶Yave ori ni miyo; nkoova — atthu khaangwera okipaka etthu.

⁷Yave ori ni miyo — ti Namakhaviheraaka; kinimoona owiniwa wa amwiittanaaka.

⁸Ti wooreera otthawela mwa Yave ohikhanle omuroromela mutthu.

⁹Ti wooreera otthawela mwa Yave ohikhanle waaroromela anamwane a mwene.

¹⁰Miloko sootheene sookirica, mene mwa Nsina na Yave koonyaatula.

¹¹Saakirica mipatta sootheene, mene mwa Nsina na Yave koonyaatula.

¹²Saakirica ntoko muupattetthe, mene saahookhwa woowaakuveya ntoko olaliheya wa nyiiwa; mwa Nsina na Yave koonyaatula.

¹³Saakikakha ni kaahanle vakhaani omora, mene Yave aakikhavihera.

¹⁴Yave ti ikurusaka ni ecipwaaka; ti ovuluxiwawaka.

¹⁵Okhuwela wa ohakalala ni owina wiiwiwa mmaheemani mwa oororomeleya: “Ntata noolopwana na Yave noopaka itthu sooweraxa!

¹⁶Ntata noolopwana na Yave ti nootheteyeya; Ntata noolopwana na Yave noopaka itthu sooweraxa!”

¹⁷Nkinkhwa, mene kinookhala ni okumi; kinoolaleiya soopaka sa Yave.

¹⁸Yave ookittaruxa moota wootepaxa, vaheera khakinnyerenre mookhwaani.

¹⁹Mukihulele nsele na ororomeleya; kintthuna ovolowa weera kimutthapele Yave.

²⁰Ola mulako wa Yave mwa yoola amvolowaaya oororomeleya.

²¹Kinimootthapelani niwoko mookaakhula; moothatuwa ovuluxiwawaka.

²²Nluku anamateka yaakhoonttaaya noothatuwa nluku noottittimiheyaxa.

²³Yave opanke yeeyo ni ti yootikhinihaxa mmaithonimwahu.

²⁴Nna nihuku Yave opankaawe; nihakalaleleke nna.

²⁵Ii! Yave munivuluxe; Ii! Yave mweerihe weera sootheene sineettele nnenesene.

²⁶Ooreelihiwa ti yoole onrwa mwa Nsina na Yave. Hiyo nnooreelihani Mpaani mwa Yave.

²⁷Yave ti Muluku ni Owo oonimwaleela ni waarawawe; mukuxe mikhoyi sa efesta mutthukelele mmanyakani ari mmaloothoni mwa altaari*.

²⁸Nyuwo ti Mulukwaaka; kinimootthapelani; Nyuwo ti Mulukwaaka; kinimoovuwihani.

²⁹Muntthapele Yave niwoko Owo ti ooreera murima; osivelawawe khoommala.