Read Makhuwa-Shirima Icipo 119 Bible Online

Icipo 119 - Makhuwa-Shirima bible

Icipo 119

¹Ooreelihiwa ti yaale aneetta mphironi mookwanela; yaale antthara Nlamulo na Yave.

²Ooreelihiwa ti yaale aniiwelela ikanosawe ni animwaasa Yoowo ni murima wootheene.

³Awosa khampaka etthu yoonanara; anneetta mphironi mwa Yave.

⁴Nyuwo muneenaanyu moovaha ikano sintthuneya wiiweleliwa nnenesene.

⁵Moota kinghaawelaaka okhala oororomeleyeene keettelaka ikanosanyu!

⁶Hiiho nkinuulihiheya muru wootthara malamulowaanyu ootheene.

⁷Kinimootthapelani ni murima wa ekhaikhai, miyo kaaxutteraka soolamulelasanyu soororomeleya.

⁸Kinimwiiwelela ikanosanyu; muhikihiyeru!

⁹Mmiravo anaawere hai weetta mphironi mootteela? Onoowera iiwelelaka maswaanyu.

¹⁰Kinoowaasani ni murimaaka wootheene; muhikihiyeke weera kihihapuwe mmalamulonimwanyu.

¹¹Koothokorora maswaanyu mmurimanimwaka weera kihootthekeleni.

¹²Mukhaleke ootthapeliwa, Yave; mukixuttihe ikanosanyu.

¹³Ni eyanowaaka kimphitela malamulowaanyu ootheene Nyuwo mvanghaanyu.

¹⁴Kinghakalalaxa wootthara ikanosanyu ompwaha yoole onghakalalela mihakhu sincipale.

¹⁵Kintthokelela ikanosanyu ni kinuupuwela nnenesene iphirosanyu.

¹⁶Kinghakalalela malamulowaanyu ni nkinttiwala maswaanyu.

¹⁷Mmoonihere murimaanyu wooreera murumeiyaanyu weera kikhale ni okumi; kinimwiiwelela maswaanyu.

¹⁸Muhuleke maithwaaka weera koone sootikhiniha sa malamulowaanyu.

¹⁹Kiri namarwa mweelaponi; muhikiipithihe malamulowaanyu.

²⁰Okumaaka onghaawelaxa malamulowaanyu mahuku ootheene.

²¹Nyuwo munaahiiha anamwiixoona; yaale oolaphiwa anghapuwa mmalamulonimwanyu.

²²Mukitapuxe mootthebwiwani ni mooramusiwani, niwoko kiniiwelela ikanosanyu.

²³Naari anamalamula ekithukumanelaka, murumeiyaanyu onootthokelela soolamulasanyu.

²⁴Aani ikanosanyu ti ohakalalawaka; iyo ti anamalakaaka.

²⁵Vano kohuuramela vathi; mwaakihe okumaaka ntoko muroromelinghaanyu.

²⁶Kohoothaliherani mweettelowaaka wootheene ni mookaakhula; mukixuttihe ikanosanyu.

²⁷Mukiweriheke wiiwexexa mahusiho a ikanosanyu ni hiiho kinootthokelela sootikhinihasanyu.

²⁸Okumaaka wookhulumuwa ni othananaxa; mukilipiheke ni maswaanyu.

²⁹Mukihuluxe iphiro soolokottha; mukixuttihe malamulowaanyu niwoko na murimaanyu wooreera.

³⁰Koothanla ephiro ya ekhaikhai; koolakela otthara ikanosanyu.

³¹Ii! Yave, kimvarexexa soolamulelasanyu; muhikihiye kuulihiheyaka muru.

³²Kintthara ephiro ya malamulowaanyu niwoko mookiiwexexiha.

³³Ii! Yave, mukixuttihe otthara ikanosanyu; vano kinimwiiwelela seiyo mpaka ommaleloni.

³⁴Mukiiwexexihe weera kitthare Nlamulonanyu ni kinimwiiwelela ni murima wootheene.

³⁵Mukeettihe mphironi ya malamulowaanyu niwoko kinghakalalela mwemmo.

³⁶Murukunuxele mukanoni murimaaka ohikhanle wa munlulani.

³⁷Muhuluxe maithwaaka wa itthu soohimuteko; muthokorore okumaaka mmasunimwanyu.

³⁸Mukwanihere yoororomeliha mumpakenlaanyu murumeiyaanyu weera mooviwe.

³⁹Mvenxeke wuulihiwa muru kinoovaaka, niwoko malamulowaanyu ti ooreera.

⁴⁰Moota kinghaawelaaka ikanosanyu! Muthokorore okumaaka moororomeleyanimwanyu.

⁴¹Ii! Yave osivelawanyu okiphwanye nitho ovuluxawanyu ntoko muroromelinghaanyu;

⁴²vano kinoowaakhula yaale ankitthebwa, niwoko kinroromela maswaanyu.

⁴³Muhicophole masu a ekhaikhai vayanoniwaka niwoko kinroromela malamulowaanyu.

⁴⁴Kinimwiiwelela woohihiyerera Nlamulonanyu wa mahuku ootheene.

⁴⁵Kinimweetta mootapuxeyani, niwoko kinaasa ikanosanyu.

⁴⁶Kinimuuluma sa ikanosanyu ohoolo wa mamwene kihuulihiheyaka muru,

⁴⁷niwoko kinghakalalela malamulowaanyu keenre kisivela yaawo.

⁴⁸Kintheteela matataaka malamulowaanyu, mwa yaawo kinsivelaaka kinatthokelela ikanosanyu.

⁴⁹Muupuwelele masu mwaamvanghaanyu murumeiyaanyu, niwoko mookivaha oweherera.

⁵⁰Opepesiwawaka moohaawanimwaka ti wu: Soororomelihasanyu sinnakikhaliha ni okumi.

⁵¹Oowiixoona annakitthebwa mahuku ootheene, vaheera nkinghuluwa mmalamulonimwanyu.

⁵²Ii! Yave, kinuupuwelela malamulowaanyu a khalayi ni mwa yaawo kinnapepeseya.

⁵³Wookitepela onyoonyiwa niwoko na atakhali, mwa yaawo akhoontte malamulowaanyu.

⁵⁴Malamulowaanyu annakiruuhela wiipa mmapuroni moothemwene kinkhalaaka.

⁵⁵Moohiyuni kinuupuwelela Nsinananyu Yave ni kinimwiiwelela Nlamulonanyu.

⁵⁶Mweettelowaaka ti ola: wiiwelela ikanosanyu.

⁵⁷Ii! Yave, Nyuwo ti yoohiyeriwaaka; koororomeliha weera kinimwiiwelela maswaanyu.

⁵⁸Kinaasaasa ekhovaanyu ni murima wootheene; mukoonihere murimaanyu wooreera ntoko mukiroromelinghaanyu.

⁵⁹Kohiixuupuwela sa mweettelowaaka ni koohokoleela wiiwelela ikanosanyu.

⁶⁰Miyo kohaakuveya, kihipisaka wiiwelela malamulowaanyu.

⁶¹Naari mikhoyi sa atakhali sitthunaka okitthuka; nkinttiwala malamulowaanyu.

⁶²Ohiyu eriyari kimvenya weera kootthapeleni niwoko na malamulowaanyu oororomeleya.

⁶³Miyo nthamwene a ootheene angwoovani; ootheene antthara ikanosanyu.

⁶⁴Ii! Yave, elapo yoosareya osivelawanyu; mukixuttihe ikanosanyu.

⁶⁵Ii! Yave, mumpakele onnene murumeiyaanyu ntoko muroromelinghaanyu.

⁶⁶Mukixuttihe esuwelo ni mathanlelo, niwoko kinroromela malamulowaanyu.

⁶⁷Kihinaaye ottaruxiwa, miyo keetta ooriheiyeene, mene vano kiniiwelela maswaanyu.

⁶⁸Nyuwo ti ooreera ni yeeyo mumpakaanyu ti yooreera; mukixuttihe ikanosanyu.

⁶⁹Naari anamwiixoona ekittikitthelaka ni soowootha, miyo kiniiwelela ikanosanyu ni murima wootheene.

⁷⁰Mirimasaya ti soowuumaxa, vaheera miyo kinghakalala mmalamulonimwanyu.

⁷¹Wookireerela ottaruxiwawaka weera kixuttere ikanosanyu,

⁷²Nlamulo na eyanowaanyu ti nootthuneyaxa opwaha eparatha* ni eyuuma yoorikaxa yootheene ya mulaponi.

⁷³Matataanyu aakipaka, enakipattuxa, mukivahe wiiwexexa weera kixuttere malamulowaanyu.

⁷⁴Yaale angwoovani yaakoonaka, anoohakalala, niwoko owehererawaka ori mmasunimwanyu.

⁷⁵Ii! Yave, koosuwela weera malamulowaanyu ti a ekhaikhai ni mookittaruxa moororomeleyanimwanyu.

⁷⁶Osivelawanyu woohimala okhaleke opepesiwawaka ntoko munroromelinghaanyu murumeiyaanyu.

⁷⁷Ikhararisanyu sikiphwanye weera kikhale ni okumi, niwoko Nlamulonanyu ti ohakalalawaka.

⁷⁸Anamwiixoona eyevihiwe niwoko na okipakela yoonanara woohinthowa, vaheera miyo kinootthokelela ikanosanyu.

⁷⁹Yaale angwoovani ewe wa miyo; aani yaale aniiwexexa ikanosanyu.

⁸⁰Murimaaka okhaleke wookwanela wa ikanosanyu weera kihuulihiheye muru.

⁸¹Okumaaka onghaawelaxa ovuluxawanyu, mene owehererawaka ori mmasunimwanyu.

⁸²Maithwaaka aakixeera wooweherera soororomelihasanyu ni kinkoha: “Mmukipepese yaakhani?”

⁸³Kirookhalaru ntoko nipoottoro nootthuwela mwiixi, nkinttiwala ikanosanyu.

⁸⁴Mpaka yaakhani murumeiyaanyu aneeraawe aweherere? Yaakhani muneeraanyu mwaattaruxe yaale ankisoonda?

⁸⁵Anamwiixoona aakithipela ekhokwe, yaale ahintthara malamulowaanyu.

⁸⁶Malamulowaanyu ootheene aaphwanela ororomeliwa; mukikhavihere, niwoko atthu ankittharatthara woohinthowa.

⁸⁷Ahanle vakhaani okiiva mweelaponi, mene nkihingye ikanosanyu.

⁸⁸Muthokorore okumaaka moosivelanimwanyu ni miyo kinimwiiwelela ikano sa eyanowaanyu.

⁸⁹Maswaanyu Yave ti oohimala; ari oolipihiweene khuluwi wiirimu.

⁹⁰Ororomeleyawanyu ori wa ikhapira sootheene; mookhaliha elapo ni eyo empwaherera yoolipeene.

⁹¹Malamulowaanyu ampwaherera mpaka olelo, niwoko sootheene sinlamuliwa ni Nyuwo.

⁹²Nahaakisivenle Nlamulonanyu, saano kiphwatiweene moohasuliwanimwaka

⁹³Nkirwa kittiwala ikanosanyu, niwoko Nyuwo munuurela okumaaka mwa seiya.

⁹⁴Mukivuluxe niwoko kiri awinyu; kinaasaasa ikanosanyu.

⁹⁵Atakhali angweherera okiphwata, vaheera miyo kintthokelela ikanosanyu.

⁹⁶Kohoona weera itthu sootheene sookhalano mwiinanowaaya, vaheera malamulowaanyu khaanono.

⁹⁷Ii! Moota ankisivelaaya malamulowaanyu! Miyo kintthokelela nihuku nenenno.

⁹⁸Soolamulasanyu sinkitatuxa namiruku waapwaha amwiittanaaka, niwoko seiya siri ni miyo mahuku ootheene.

⁹⁹Kinniiwexexa waapwaha ahusihaaka ootheene, niwoko kintthokelela ikanosanyu.

¹⁰⁰Kinniiwexexa waapwaha asitokweene niwoko kinniiwelela malamulowaanyu.

¹⁰¹Koosemba khula ephiro yoonanara weera kiiwelele maswaanyu.

¹⁰²Nkinghuluwa mmalamulonimwanyu, niwoko ti Nyuwo munkixuttiha.

¹⁰³Maswaanyu ti oosivaxa wa miyo; oocoocowaxa opwaha oravo.

¹⁰⁴Kinnawina wiiwexexa mwa ikanosanyu; tivawo kinthanyaaka iphiro soonanara sootheene.

¹⁰⁵Maswaanyu ti yoomwaleela ya malipaaka ni waara onooniha ephirowaaka.

¹⁰⁶Koororomeliha ni nlipelo weera kinootthara malamulowaanyu a ekhaikhai.

¹⁰⁷Koohaawa vancipale; Ii! Yave, muthokorore okumaaka ntoko muroromelinghaanyu.

¹⁰⁸Ii! Yave, mwaakhulele soottottopela sootthuneya sa eyanowaaka ni mukixuttihe malamulowaanyu.

¹⁰⁹Okumaaka onkhala ngwoopihani mahuku ootheene; mene nkinttiwala malamulowaanyu.

¹¹⁰Atakhali aakireya ntapha, mene nkinghuluwa ikanosanyu.

¹¹¹Ikanosanyu ti yoohiyeriwaaka ya mahuku ootheene; ti ohakalala wa murimaaka.

¹¹²Murimaaka woothanla khuluwi wiiwelela ikanosanyu mpaka ommaleloni.

¹¹³Kinimuthanya namvara piili-piili, mene kinsivela Nlamulonanyu.

¹¹⁴Nyuwo ti wootthawelawaka ni yoowiixaakiheraaka; owehererawaka ori mmasunimwanyu.

¹¹⁵Mukivenyere nyuwosa mumpaka soonanara! Miyo kintthuna weettela malamulo a Mulukwaaka!

¹¹⁶Mukilipihere ntoko mukiroromelinghaanyu ni miyo kinookhala ni okumi; muhitthunihere weera owehererawaka waase omala.

¹¹⁷Mukikhavihere ni kinoovuluxiwa; miyo kinoopwattha ikanosanyu mahuku ootheene.

¹¹⁸Nyuwo munaakhootta ootheene anghiya ikanosanyu, niwoko soowuupuwelasaya soolokottha khasimuteko.

¹¹⁹Nyuwo munaavonyera okerekhere atakhali ootheene a elapo ntoko ikokhola; tivawo kinsivelaaka ikanosanyu.

¹²⁰Erutthwaaka enthukumela ohoolowanyu; malamulowaanyu ankiruuhelaxa woova.

¹²¹Kookhala moororomeleyani ni ngwookoleleyani; muhikithaame mmatatani mwa anamakihasula.

¹²²Muroromelihe mpuha wa murumeiyaanyu; muhaatthunihere anamwiixoona okihasula.

¹²³Maithwaaka aakixeera kiwehereraka ovuluxawanyu ni okwanihera ekhaikhaiyaanyu.

¹²⁴Mmoonihere murumeiyaanyu osivelawanyu ni mukixuttihe ikanosanyu.

¹²⁵Miyo murumeiyaanyu; mukivahe miruku weera kiiwexexe soolamulasanyu.

¹²⁶Ii! Yave yoophiya ehuhu yoopaka etthu, niwoko Nlamulonanyu khaninttittimihiwa.

¹²⁷Miyo kinnasivela malamulowaanyu opwaha eyuuma yoorikaxa, aani eyuuma yoorikaxa yooreera.

¹²⁸Tivawo kinoonelaaka ekhaikhai ikanosanyu sootheene ni kinthanyaaka khula ephiro yoonanara.

¹²⁹Soolamulasanyu ti sootikhiniha; tivawo kiniiwelelaaka.

¹³⁰Ethalihero ya maswaanyu emmwaleela, enaavaha wiiwexexa oohiiwexexa.

¹³¹Kinghula eyanowaaka kinahihimera, kihaawelaxaka malamulowaanyu.

¹³²Mukiwehe ni mukimorele ikharari ntoko munaapakelaanyu mahuku ootheene yaale ansivela Nsinananyu.

¹³³Muhoolele malipaaka mmasunimwanyu; muhikitthunihereru olamuliwa ni yoottheka.

¹³⁴Mukoopole mwa ohasula wa atthu weera kiiwelele ikanosanyu.

¹³⁵Mummwaleele murumeiyaanyu ni waara wa ekhovaanyu ni mukixuttihe ikanosanyu.

¹³⁶Nkimmaala wiinla, niwoko Nlamulonanyu khanneetteliwa.

¹³⁷Yave, Nyuwo ti oororomeleya ni malamulowaanyu ti a ekhaikhai.

¹³⁸Moolamulela ikanosanyu ni ekhaikhai; seiya ti soophwanela ororomela.

¹³⁹Nthitinaka ninnakikhulumula, niwoko amwiittanaaka khaampwattha maswaanyu.

¹⁴⁰Soororomelihasanyu sohaakhuleleyaxa; tivawo murumeiyaanyu ola onsivelaawe.

¹⁴¹Kirookhalaru mukhaanene ni oohooneliwa, nkinttiwala ikanosayu.

¹⁴²Ororomeleyawanyu ti woohimala ni Nlamulonanyu ti na ekhaikhai.

¹⁴³Ohaawa ni othanana wookimorela, mene malamulowaanyu ti ohakalalawaka.

¹⁴⁴Ikanosanyu ti sa ekhaikhai wa mahuku ootheene; mukivahe wiiwexexa weera kikhale ni okumi.

¹⁴⁵Kinkhuwela ni murima wootheene; Ii! Yave mukaakhule ni kinimwiiwelela soolamulasanyu.

¹⁴⁶Kinookhuwelelani Nyuwo; mukivuluxe ni kinimwiiwelela ikanosanyu.

¹⁴⁷Ohinaaye oxa kinnavenya ni kindyoonttelela ekhaviherowaanyu; owehererawaka ori mmasunimwanyu.

¹⁴⁸Ohiyu wootheene nkinkona weera kitthokelele soororomelihasanyu.

¹⁴⁹Mwiiwe nsunaka moosivelanimwanyu; Ii! Yave, muthokorore okumaaka mmalamulonimwanyu.

¹⁵⁰Yaale amvaanelela soowuupuwela soonanara ari vakhiviru; vaheera ari ottaiwene wa Nlamulonanyu.

¹⁵¹Wa soothesene, Nyuwo, Yave, muri vakhiviru; malamulowaanyu ootheene ari a ekhaikhai.

¹⁵²Kixuttenre khalayi ikanosanyu seiyo mukhalihalaanyu wa mahuku ootheene.

¹⁵³Ngwehe ohaawawaka ni mukoopole niwoko nkinttiwala Nlamulonanyu.

¹⁵⁴Mwaakihe nthowanaka ni mukoopole; muthokorore okumaaka ntoko muroromelinghaanyu.

¹⁵⁵Ovuluxiwa ori ottai wa atakhali, niwoko awosa khaanaasaasa ikanosanyu.

¹⁵⁶Ii! Yave, ikhararisanyu ti sitokotoko; muthokorore okumaaka muttharihaka malamulowaanyu.

¹⁵⁷Ancipale ari amwiittana ankittharatthara; vaheera nkinghuluwa ikanosanyu.

¹⁵⁸Kaawoonaka oohiroromela kinnaaramusa, niwoko khaaniiwelela maswaanyu.

¹⁵⁹Moone moota kinsivelaaka ikanosanyu; muthokorore okumaaka moosivelanimwanyu.

¹⁶⁰Maswaanyu ootheene ari a ekhaikhai; malamulo oororomeleya ootheene ari oohimala.

¹⁶¹Anamalamula ankittharatthara woohinthowa, mene murimaaka onthukumela woowiiwa maswaanyu paahi.

¹⁶²Kinghakalalela yoororomelihaanyu ntoko mutthu omphwanya soohuhula sincipale.

¹⁶³Kinthanya ni kinramusa soowootha, mene kinsivela Nlamulonanyu.

¹⁶⁴Vanihukuni kinnoottottopelani imaara ithanapiili niwoko na malamulowaanyu oororomeleya.

¹⁶⁵Yaale ansivela Nlamulonanyu ankhalano murettele mutokotoko; kheewowo enaakwattuliha.

¹⁶⁶Ii! Yave, kingweherera ovuluxawanyu ni kintthara malamulowaanyu.

¹⁶⁷Kiniiwelela ikanosanyu niwoko kinsivela moota woohimala.

¹⁶⁸Kiniiwelela ikanosanyu ni soolamulasanyu sootheene, niwoko iphirosaka sootheene soosuweliwa ni Nyuwo.

¹⁶⁹Ii! Yave, okhuwelawaka ophiye vamaithoniwanyu; mukivahe wiiwexexa mmasunimwanyu.

¹⁷⁰Wiidyoonttelelawaka ophiye wa Nyuwo; mukoopole ntoko muroromelinghaanyu.

¹⁷¹Iyanosaka sinoosareya ottottopela, niwoko Nyuwo munkixuttiha ikanosanyu.

¹⁷²Nluminaka nnimwiipela maswaanyu, niwoko malamulowaanyu ootheene ari a ekhaikhai.

¹⁷³Ntatananyu nirwe nikikhavihere, niwoko koothanla ikanosanyu.

¹⁷⁴Ii! Yave, kinghaawela ovuluxawanyu ni kinghakalalela Nlamulonanyu.

¹⁷⁵Mukitthunihere okhala ni okumi weera koottottopeleni ni nlamulonanyu nikikhavihereke.

¹⁷⁶Kooxoraxora ntoko ekhondoolo yoothweelela. Murwe, mmwaasaase murumeiyaanyu, niwoko nkittiwanle malamulowaanyu.