Read Makhuwa-Shirima Icipo 132 Bible Online

Icipo 132 - Makhuwa-Shirima bible

Icipo 132

¹Ecipo ya owela. Ii! Yave, mmuupuwelele Davide ni makacamiho ootheene aahaawaawe.

²Owo aamulipela Yave ni aamuroromeliha Muluku Ooweraxa a Yakobe:

³Nkimvolowa mpaani kinkhalaaka hata nkiniixaatalela vabeettiniwaka;

⁴nkintthunihera maithwaaka ovoliwa ikhove, naari makwikhwaaka wiitthuuwa

⁵kihinaaye ophwanya nipuro wa Yave, woomakawo wa Muluku Ooweraxa a Yakobe.

⁶Nohiiwa weera Arka* a wiiraana yaari wEfrata, mene naaphwannye mweelaponi ya oYahari:

⁷“Niroweke omankaawewo Yave; nattottopeleke vathi wa ehicaawe —

⁸Ii! Yave, mvenye ni mwaphiye vanipuroniwanyu noowiitthuuwa — Nyuwo ni Arka* a ikurusanyu.

⁹Asaserdotaanyu eware ororomeleya; ootteelaanyu yiipeke ni ohakalala.”

¹⁰Woomusivelani murumeiyaanyu Davide, muhimukhotte oottikittheliwaanyu.

¹¹Yave aamuroromeliha murumeiyaawe Davide — nlipelo na ekhaikhai noohiceendyeya: “Kinoomukhaliha vahiceniwanyu ya emwene mmoha a ekhapiraanyu xaxaxa.

¹²Anamwaniinyu yiiwelela wiiraanawaka ni ikano kinaaxuttihaaka, vano anamwanaayatho eniikilaathi vahiceniwanyu ya emwene wa mahuku ootheene.”

¹³Vano Yave oothanla oSiyoni eerelaka opaka nipuro na omakawawe:

¹⁴“Nna nnikhale nipuronaka noowiitthuuwa wa mahuku ootheene; va kinookilaathi vahiceni ya emwene, niwoko eyo ti yoohaawelaaka.

¹⁵Kinooreeliha nipuro nna ni sooreerela sincipale; oohaawaaya kinimwaavoniha ni sooca.

¹⁶Kinimwaawariha asaserdotaaya sa ovuluxiwa ni ootteelaaya animwiipa ni ohakalala wa mahuku ootheene.

¹⁷Va kinookhumeleliha ikuru sa Davide, kaarihaka omwaleela wa oottikittheliwaaka.

¹⁸Kinimwaawariha amwiittanaawe sa wuulihiwa muru, vaheera ecireemba vamuruwawe eniikhale yoowaaraxa.”