Read Makhuwa-Shirima Icipo 136 Bible Online

Icipo 136 - Makhuwa-Shirima bible

Icipo 136

¹Muntthapele Yave, niwoko Owo ti ooreera. Osivelawawe ompwaherera wa mahuku ootheene.

²Muntthapele Muluku a miluku. Osivelawawe ompwaherera wa mahuku ootheene!

³Muntthapele Yave a asipwiiya. Osivelawawe ompwaherera wa mahuku ootheene.

⁴Ti Yoowo paahi ompaka sootikhiniha sitokotoko. Osivelawawe ompwaherera wa mahuku ootheene.

⁵Ti Yoowo opattunxe erimu moorattani. Osivelawawe ompwaherera wa mahuku ootheene.

⁶Ti Yoowo aatanle etthaya vasulu wa maahi. Osivelawawe ompwaherera wa mahuku ootheene.

⁷Ti Yoowo opattunxe soomwaleela sitokotoko — osivelawawe ompwaherera wa mahuku ootheene,

⁸ni nsuwa weera nilamule othana — osivelawawe ompwaherera wa mahuku ootheene,

⁹mweeri ni ithenyeeri weera silamule ohiyu — osivelawawe ompwaherera wa mahuku ootheene.

¹⁰Ti Yoowo iivale matthaara a wExipitu. Osivelawawe ompwaherera wa mahuku ootheene.

¹¹Ti Yoowo aakhumihale aYixrayeli variyariwaya — osivelawawe ompwaherera wa mahuku ootheene,

¹²ni ntata nooweraxa ni moono woolipaxa. Osivelawawe ompwaherera wa mahuku ootheene.

¹³Ti Yoowo aakawanyinghe ephareiya yooxeera — osivelawawe ompwaherera wa mahuku ootheene,

¹⁴anaalapuxa aYixrayeli. Osivelawawe ompwaherera wa mahuku ootheene,

¹⁵vaheera aamvonyera Farawu* ni anakhottwaawe mphareiyani yooxeera. Osivelawawe ompwaherera wa mahuku ootheene.

¹⁶Ti Yoowo eettinghe mulokwaawe munikareni. Osivelawawe ompwaherera wa mahuku ootheene.

¹⁷Ti Yoowo aamanne mamwene matokotoko — osivelawawe ompwaherera wa mahuku ootheene,

¹⁸anawiiva mamwene ooweraxa — osivelawawe ompwaherera wa mahuku ootheene:

¹⁹Sihoni, mwene a awAmori — osivelawawe ompwaherera wa mahuku ootheene,

²⁰ni Ogi, mwene a oBaxani. Osivelawawe ompwaherera wa mahuku ootheene.

²¹Ti Yoowo aavanghe ilaposaya ntoko yoohiyeriwa — osivelawawe ompwaherera wa mahuku ootheene,

²²ntoko yoohiyeriwa wa murumeiyaawe Yixrayeli. Osivelawawe ompwaherera wa mahuku ootheene.

²³Ti Yoowo aanuupuwelenle naayevihiwaahu — osivelawawe ompwaherera wa mahuku ootheene,

²⁴ni oonoopola mwa amwiittanaahu. Osivelawawe ompwaherera wa mahuku ootheene.

²⁵Ti Yoowo omvaha sooca sootheene sirino okumi. Osivelawawe ompwaherera wa mahuku ootheene.

²⁶Muntthapele Muluku a wiirimu. Osivelawawe ompwaherera wa mahuku ootheene.