Read Makhuwa-Shirima Icipo 138 Bible Online

Icipo 138 - Makhuwa-Shirima bible

Icipo 138

¹Ecipo ya Davide. Ii! Yave kinimoottottopelani ni murima wootheene; kinimwiipa ottottopeleyawawe ohoolo wa miluku sikina.

²Kinookokhorela Mpaanimwanyu Yootteela ni kinoottottopela Nsinananyu mwaha wa osivelawanyu ni ororomeleyawanyu, niwoko moovuwiha Nsinananyu ni maswaanyu opwaha itthu sootheene sikina.

³Miyo kookhuwelenlaakani, Nyuwo mwaakaakhula; mookitatuxa oolipa murima ni oosareya ikuru.

⁴Mamwene ootheene a elapo animoottottopelani, Yave, yiiwaka masu a eyanowaanyu.

⁵Awosa animwiipela soopaka sa Yave, niwoko ovuwa wa Yave ti otokotoko.

⁶Naari Yave akhalaka musulusulu, onnaaweha oowiiyeviha, vaheera ottai ottai, onnaasuwela oowiixoona.

⁷Naari kiviraka mmakacamihoni, nyuwo munuurela okumaaka; munookolela moonowaanyu woolopwana isara sa amwiittanaaka, munakitapuxa.

⁸Yave onookwanihera yootthunaawe wa miyo; Ii! Yave, osivelawanyu ompwaherera wa mahuku ootheene — muhihiye miteko sa matataanyu.