Read Makhuwa-Shirima Icipo 140 Bible Online

Icipo 140 - Makhuwa-Shirima bible

Icipo 140

¹Wa mutokweene a icipo ni ikaruma sa mikhoyi. Ecipo ya Davide. Ii! Yave mukoopole mwa atthu oonanara murima; mukaakihe mwa anamapuhera,

²mwa yaawo vamurimaniwaya amvaanelela soowuupuwela soonanara etannyaka ekhotto khula nihuku.

³Ansongola malumaaya ntoko a enowa; yoohapala ya evili eri vayanoniwaya. Sela*

⁴Ii! Yave, mukithokorore mwa matata a atakhali; mukaakihe mwa anamapuhera antthuna okikwattuliha.

⁵Asilopwana oowiixoona aakireya muraakho, anamariheya anreya itthavisaya; mphironimwaka aakireya itapha.

⁶Ii! Yave, miyo kinooleelani: “Nyuwo ti Mulukwaaka.” Ii! Yave, mwiiwe okhuwelelawaka ikharari.

⁷Ii! Yave onlamula sootheene, Namoopolaaka oolipaxa, Nyuwo munaakiha muruwaaka munihukuni na ekhotto.

⁸Ii! Yave, muhaakhulele soohaawela sa atakhali; muhitthunihere weera soovaanelasaya seetteleye nnenesene yiixoonaka.

⁹Nyuru sa yaale ankirica sikhuneeliwe ni soonanara seiye iyanosaya suulummaaya.

¹⁰Yaamorele makhala a mooro; awosa evonyeriwe mmooroni, mulittini eneeraaya ehiwereru okhuma.

¹¹Yaale ankaapa ehitekihiwe mweelaponi; erisa yaalupatthe anamapuhera mpaka okhwa.

¹²Koosuwela weera Yave onimwaakiha mulattu wa oothoiwa ni onimwaapakela ekhaikhai oohaawa.

¹³Vekhaikhai oororomeleya anoottottopela Nsinananyu ni atthu ansivela ekhaikhai anookhala vamaithoniwanyu.