Read Makhuwa-Shirima Icipo 141 Bible Online

Icipo 141 - Makhuwa-Shirima bible

Icipo 141

¹Ecipo ya Davide. Ii! Yave, miyo kinookhuwelelani Nyuwo; ngwe woowaakuveya. Mwiiwe nsunaka miyo kookhuwelelakani.

²Nivekelonaka nikhale ntoko erubani* ohoolowanyu; otheteyawaka matata okhaleke ntoko yooveleela ya ohiyu.

³Ii! Yave, mmwiikaathi namalipelela vayanoniwaka; ngwehawehe mulako wa eyanowaaka.

⁴Muhitthunihere weera murimaaka ohokoleele wa yoonanara, hata miyo kihivitikeleleye mwa soopaka sa ooriheya ni atakhali. Miyo kihirwe kipakela mpatta wa ifestasaya.

⁵Mutthu oororomeleya akimaneke ni mutthu oomaaleleya murima akihiihe; onuukhale ntoko makhura ooreeraxa mmurumwaka miyo nkirwa kikhootta. Wa soothesene, mavekelowaaka khaancelana ni ipakelo sa atthu oonanara.

⁶Anamalamulaaya yaavonyeriwaka moowiixera ootheene anoosuwela weera maswaaka yaari a ekhaikhai.

⁷Awosa eniyeere: “Makhuvaahu aamwareela mmwano mwa nihiye ntoko etthaya yaalimmwaka ni yaakhwiriwaka.”

⁸Vaheera maithwaaka anoowehexexani Nyuwo Yave munlamula sootheene; miyo kintthawela wa Nyuwo — muhikinnyerere mookhwaani.

⁹Mukithokorore mwa itapha akireiyaaya; mwa miraakho sa atakhali.

¹⁰Atakhali ephariwe mutthavinimwaya miyo koopowaka oolipeene.