Read Makhuwa-Shirima Icipo 143 Bible Online

Icipo 143 - Makhuwa-Shirima bible

Icipo 143

¹Ecipo ya Davide. Ii! Yave, mwiiwe nivekelonaka; mwiiwe okhuwelelawaka ikharari; mukikhavihere moororomeleyani ni mweekhaikhaiyinimwanyu.

²Muhimuronghe murumeiyaanyu onthoriheloni, niwoko khawoworu ori oohikhalano nthowa vamaithoniwanyu.

³Mwiittana onkittharatthara anakiswanyera vathi. Owo ompakiha weera kikhale mpiphini ntoko yaale akhwiiye khalayi.

⁴Vano okumaaka wooporora; murimaaka khoonkikhalakhala.

⁵Kinuupuwelela mahuku a khalayi; kintthokelela mitekosanyu sootheene kuupuwelelaka seiye matataanyu apankaaya.

⁶Kinootheteelani matataaka; ntoko etthaya yoowuumaxa okumaaka woovoliwa ntthona nowoohaawelani Nyuwo. Sela*

⁷Ii! Yave, mwaakuve okaakhula; okumaaka wooporora. Muhikihuluxere ekhovaanyu weera kihikhale ntoko yaawo anrowa munihiyeni.

⁸Mooxeexeloni, mukiiwihe sa osivelawanyu woororomeleya-, niwoko kohoororomelani Nyuwo. Mukoonihereke ephiro entthuneya otthara, niwoko okumaaka kingwinnyererani Nyuwo.

⁹Mukivuluxe mwa amwiittanaaka Yave, niwoko kiniipitha mwa Nyuwo.

¹⁰Mukixuttihe opaka otthunawanyu, niwoko Nyuwo ti Mulukwaaka. Munepaanyu Wooreera okeettihe munghawalawani.

¹¹Ii! Yave, mwaha wa Nsinananyu, muthokorore okumaaka; mukivenxe moothanananimu niwoko na ororomeleyawanyu.

¹²Moosivelanimwanyu woohimala mwaamalihe amwiittanaaka; mwaaphwate yaawosa ootheene, niwoko kiri murumeiyaanyu.