Read Makhuwa-Shirima Icipo 144 Bible Online

Icipo 144 - Makhuwa-Shirima bible

Icipo 144

¹Ecipo ya Davide. Yave Mwalaaka atthapeliwe, mwa Yoowo onxuttiha matataaka owana; ikathasaka wa ekhotto.

²Owo ti Mulukwaaka oosareya osivela ni Nipuronaka Noolipaxa; Yoowiixaakiheraaka ni Namoopolaaka; exikudwaaka mwa Yeeyo kintthawelaaka. Ti Yoowo onlamula miloko akeerelaka miyo.

³Ii! Yave mutthu taani oompwattha Nyuwo, ni mwaana a mutthu weera mmoonelemo?

⁴Mutthu ori ntoko iphumu; mahukwaawe ari ntoko munttuusi omvira.

⁵Muhuleke erimwaanyu Yave ni mukhuruwe; mutave nyaako weera sitthuwe.

⁶Murumihe overinya ni mwaamwaraxe amwiittana; mulathe nyuupasanyu ni mwaaphwate.

⁷Osulu iwo, mookole moonowaanyu ni mukitapuxe; mukivuluxe mmaahini oowaatta; mmatatani mwa anamarwa,

⁸mwa yaawo arino iyano soowootha ni yeemenxeene moono anlipela yoothaka.

⁹Ii! Yave, kinoowiipelani ecipo enyowani; kinoowiipelani lira* a ifiiyu muloko,

¹⁰Nyuwo munaawiniha mamwene ni munimutapuxa murumeiyaanyu Davide wa ekatana yoowiiva.

¹¹Mukivuluxe ni mukoopole mwa matata a anamarwa, mwa yaawo arino iyano soowootha ni yeemenxeene moono anlipela yoothaka.

¹²Vano moomiravoni anamwaniihu asilopwana anookhala ntoko soophatteiwa sookosoopiwa nnenesene ni anamwaniihu asithiyana ntoko amarimbu oocaambuliwa weera ephwaneliwe empa ya emwene.

¹³Matathaahu anoosareya ni sooreerela soohiyanahiyana. Mihuwosahu sinimwaatta macira macireene mmattamwahu.

¹⁴Imombesahu sinoolemeliwa ni mirindi sa sooreerela. Elapwaahu kheevoleeliwa, naari hiyo khaniroihiwa wootthukiwani. Khookhala okhuwela wa othanana mmisewenimwahu.

¹⁵Wooreelihiwa ti muloko oneereeliwa hiiho; wooreelihiwa ti muloko orino Yave ntoko Mulukwaaya.