Read Makhuwa-Shirima Icipo 148 Bible Online

Icipo 148 - Makhuwa-Shirima bible

Icipo 148

¹Munttottopele Yave. Munttottopele Yave okhuma wiirimu; Munttottopele a Musulusulu.

²Munttottopele Yave nyuwosa andyelowaawe ootheene; munttottopele Yave nyuwosa anakhottwaawe ootheene a wiirimu.

³Munttottopele Yave nyuwo nsuwa ni mweeri; munttottopele Yave nyuwosa ithenyeeri sootheene soowaaraxa.

⁴Munttottopele nyuwo irimu soorakamelaxa ni maahi ari musulusulu.

⁵Sootheene iyo sittottopele Nsina na Yave, niwoko Owo aalamulela ni seiyo saapattuxiwa.

⁶Owo ookhaliha mmapuronimwaya wa mahuku ootheene; aalaleiya ikano soohiceendyeya.

⁷Munttottopele Yave okhuma mweelaponi, nyuwosa soopattuxiwa sitokotoko sa mphareiyani ni moowiixera moothemwene,

⁸nyuwosa overinya ni maralala, etthabwe ni kanyenye, ipheyo soolipaxa sinkwanihera otthunawawe.

⁹Munttottopele Yave nyuwosa nyaako ni mattumuxa ootheene, nyiri siniima ni sa esedari*,

¹⁰axinama ootheene a mutuphini ni mihuwo sootheene, soowiipurula ni ipalame.

¹¹Munttottopele Yave mamwene a elapo ya vathi ni miloko sootheene, anamwane asilopwana a mamwene ni aphuki ootheene a vathi,

¹²amiravo ni asimwali, asitokweene ni anamwane.

¹³Awosa ettottopeleke Nsina na Yave, niwoko Nsinanawe paahi ti noovuwihiwa; ovuwawaya woopwaha etthaya ni erimu.

¹⁴Oovaha mulokwaawe ikuru anaakhela soottottopela sa ootteelaawe ootheene, aYixrayeli, muloko onsivelaxaawe. Munttottopele Yave.