Read Makhuwa-Shirima Icipo 18 Bible Online

Icipo 18 - Makhuwa-Shirima bible

Icipo 18

¹Wa mutokweene a icipo. Ecipo ya Davide, murumeiyi a Yave. Davide aamwiipela Yave ecipo ela Yave aamooponlaawe mmatatani mwa amwiittanaawe ootheene ni mwa Sawuli. Davide eenre: Ii! Yave, Nyuwo ti ikurusaka; kinnoosivelani!

²Yave ti Mwalaaka, Woolipawaka ni Namoopolaaka. Mulukwaaka ti Mwalaaka, mwa mwemmo kintthawelaakamo. Owo ti Exikudwaaka ni Nnyaka na ovuluxiwawaka — Nipuronaka noolipaxa nootthawelamo.

³Kinimwiitthana Yave mwa Yoowo omphwanela ottottopeliwa ni miyo koovuluxiwa wa amwiittanaaka.

⁴Mikhoyi sa okhwa sookitthuka; nyooloko sa ophwata sookoopopiha.

⁵Onyooro wa munihiyeni wookivitikelela; matapha a okhwa aakiphariha.

⁶Ngwoovanimwaka kaamwiitthana Yave; kaamukhuwelela Mulukwaaka weera akikhavihere. Mpaanimwawe aahiiwa nsunaka; okhuwelawaka woophiya ohoolowawe; ohiiwa.

⁷Etthaya yaatetereyaxa; mathipelo a nyaako yaattikinyeya. Saattikinyeenre niwoko Owo aanyoonyiwa.

⁸Mphulanimwawe waatthuwa mwiixi; mmwaanomwawe yaakhuma makhala a mooro woolaliha.

⁹Aahula wiirimu, anakhuruwa; mahutte ooriipihana yaari vathi wa inaawosawe.

¹⁰Aangwela kerubini*, anavava; aavava mmapuphani a epheyo.

¹¹Aahiixiipithiha mpiphini iikuttelelaka ni mahutte ooripihana.

¹²Ngwaarani wa okhalawawe yaavarela mahutte vamoha ni maralala ni overinya.

¹³Yave aakukutteya wiirimu; nsu na Musulusulu naaruma.

¹⁴Owo aalatha nyuupasawe anaamwaraxa amwiittanaaka; aaverunyiha mipatta sootheene, awoomolaka.

¹⁵Moohiihanimwanyu vamoha ni wiiselelawanyu wa mphulani waahooneya wiixera wa ephareiya ni mathipelo a elapo ya vathi yaakhala vanlakani.

¹⁶Musulusulu aahookola ntata, anakivarela; aakikhumiha mmaahini moowiixera.

¹⁷Aakivuluxa mwa mwiittanaaka ooweraxa; mwa awananaaka yaari ookivikana.

¹⁸Awosa yaakiwanano nihuku na othananawaka, mene Yave aari ekhaviherowaaka.

¹⁹Aakitapuxa woomalela; aakoopola niwoko onnakitthuna nnenesene.

²⁰Yave aakipakela yeeyo niwoko na olokawaka; aakitthuvela attharihaka mweettelowaaka woohinthowa.

²¹Miyo koheettela ephiro ya Yave; nkitapannye kimuhiyaka Mulukwaaka.

²²Malamulowaawe ootheene ari ohoolowaka; nkihingyeru ikanosawe.

²³Nkipahunle etthu vamaithoniwawe; koosemba soottheka.

²⁴Yave ookitthuvela niwoko na olokawaka ni na mweettelowaaka woohinthowa vamaithoniwawe.

²⁵Nyuwo muniixoonihera Oororomeleya wa yaale ari oororomeleya; ni Ookwanela wa yaale ari ookwanela.

²⁶Muniixoonihera Ootteela wa yaale ari ootteela, vaheera muri Mwiittana a alavilavi.

²⁷Munaavuluxa oowiiyeviha, mene munaayeviha oowiixoona.

²⁸Nyuwo, Yave, mumpwaherera opattiha onyaaraaka; Mulukwaaka onkimwaleela mpiphinimwaka.

²⁹Mukurunimwanyu kinoowera waawina anakhotto ancipale; ni ekhavihero ya Mulukwaaka kinoowera otupha exiri.

³⁰Ephiro ya Muluku ti yookwanela; masu a Yave ti oophwanela ororomela. Owo ti yoowiixaakihera wa ootheene animuroromela.

³¹Khoowowo muluku mukina ahikhanle Yave; Mulukwaaka ti Mwala Mmoharu.

³²Ti Muluku onkilipiha ni ontatuxa ephirowaaka yookwanela.

³³Owo onaaluxa nyettosaka ntoko ekhomaci; onkeettiha oolipeene mmanyaakoni soorakamela.

³⁴Onxuttiha matataaka owana; onkivareliha muupa wa ebronze*.

³⁵Nyuwo munkivaha yoowiixaakiheraanyu yoowina ni ntatananyu noolopwana ninkikosoopa; munkikhavihera, mukunnuwihaka.

³⁶Mookikhweihera ephirowaaka weera inaawosaka sihiserenguwe.

³⁷Kohaattharelela amwiittanaaka, kinaaphwanya. Nkihokolongwe ehiphwatingwe.

³⁸Kohaanyaanyaxa weera ehiwere weemelatho; yaamorela mmettonimwaka.

³⁹Nyuwo mookivaha ikuru soowanano; moopakiha weera amwiittanaaka elamuliweke ni miyo.

⁴⁰Moowoomola amwiittanaaka; kohaaphwata yaale yaakithanya.

⁴¹Awosa yaakhuwela evekelaka ekhavihero, mene khaariwo oowaavuluxa; yaamvekelaxa Yave, mene Owo khaawaakhunle.

⁴²Kohaatatuxa ntthupi nimvavihiwa ni epheyo; kohaanyikalasa ntoko nttoko na munseweni.

⁴³Mookoopola mwa muloko onkiwanano; mookikhaliha muhooleli a miloko; muloko wahaakisuwenle wookirumeela.

⁴⁴Awosa yakiiwaru, animwiiwelela khuluwi; anamarwa ankittittimihaxa ni woova.

⁴⁵Ootheenaawo aapororasa; ankhuma moolipamwaya ethukumelaka.

⁴⁶Yave Mukumi! Atthapeliwe Mwalaaka. Avuwihiwe Muluku, Mvuluxaaka!

⁴⁷Owo ti Muluku onkiinlelela ikukuttula; Owo onlamulela miloko weera sikirumeele.

⁴⁸Ti Nyuwu munkoopola mwa amwiittanaaka. Nyuwo mookikhaliha vasulu wa awananaaka. Mookivuluxa mwa anamapuhera.

⁴⁹Tivawo kineeraaka kitthapele Nsinananyu variyari wa miloko, ii Yave. Kinimwiipela soottottopela Nsinananyu.

⁵⁰Owo oningwinihaxa mwenaawe; ommoonihera onnene oottikittheliwaawe, wa Davide ni ekhapiraawe wa mahuku ootheene!”