Read Makhuwa-Shirima Icipo 19 Bible Online

Icipo 19 - Makhuwa-Shirima bible

Icipo 19

¹Wa mutokweene a icipo. Ecipo ya Davide. Wiirimu onlaleiya ovuwa wa Muluku; musulusulu onlaleiya miteko sa matataawe.

²Nihuku ti nihuku onuuluma sa ovuwawawe; ohiyu ti ohiyu ovuwawawe onimooniheriwa.

³Othana ni ohiyu khoonlokolola hata ni masu ni nsunaya khanniiwanyeya.

⁴Vaheera nsunaya ninsuwanyeya mweelaponi ya vathi yootheene ni maswaaya mpaka ekotenle elapo. Wiirimu Yave aakungela nsuwa eheema,

⁵nri ntoko namatthomera onkhuma mukwartunimwawe, ntoko mulopwana ootthimaka ontthuna opacera otthimaka.

⁶Ninkhuma mpatta mmoha wa wiirimu, nneetta mpatta mukina; ovihawaya onookwanela itthu sootheene.

⁷Nlamulo na Yave ti nookwanela nivahaka okumi; ikano sa Yave ti soororomeleya sintatuxaka oohilipa namiruku.

⁸Soolamula sa Yave ti sa ekhaikhai sihakalalihaka murima; malamulo a Yave ti waara ommwaleela muupuwelo.

⁹Wooveya wa Yave ti wootteela ompwaherera mahuku ootheene; ikano sa Yave ti sa ekhaikhai ni soororomeleya.

¹⁰Ti sootthuneyaxa opwaha eyuuma yoorikaxa — aani iyuuma soorikaxa sincipale. Ti soocoocowa opwaha oravo, aani opwaha ikuttha.

¹¹Murumeiyaanyu onoopereriwa ni seiye ni yoole onkwanihera seiyo onimwaakhela ntthuvelo ntokotoko.

¹²Taani onsuwela sootapanyasawe sootheene? Mukilevelele sootapanya seiyo kihisuwenlaaka.

¹³Mukihiihe wa soottheka sa emwayiini weera sihikilamule. Hiiho kinookhala ookwanela ni oohinthowa.

¹⁴Masu a eyaanowaaka ni sootthokelela sa murimaaka soosiveliheni Nyuwo Yave, Mwalaaka ni Namoopolaaka.