Read Makhuwa-Shirima Icipo 24 Bible Online

Icipo 24 - Makhuwa-Shirima bible

Icipo 24

¹Ecipo ya Davide. Elapo ya vathi ti ya Yave vamoha ni sootheene sirimo; hiihotho elapo ni ootheene ankhalamo,

²niwoko Owo oopaka yeeyo vasulu wa maahi a mphareiyani, anapattuxa antthimakaayawo maahi.

³Taani ophwanenle owela Nttumuxa na Yave? Taani ongwera weemela vaNipuroniwawe Nootteela?

⁴Yoole orino matata ni murima wootteela, mwa yoowo ohinttottopela miluku soowootha hata ohinaasa olipela.

⁵Owo onimwaakhela mareeliho a Yave ni Muluku Mvuluxaawe onoompakela ekhaikhai.

⁶Ti hiiho yaale ammwaasa Yave, yaale angwaasani Nyuwo, Muluku a Yakobe. Sela*

⁷Ii! Milako, muhuleye; muhuleye milako sa khalayi, weera Mwene a ovuwa avolowe.

⁸Mwene a ovuwa taani? Ti Yave a ikuru ni ooweraxa, Yave a ikuru mukhottoni.

⁹Ii! Milako, muhuleye; muhuleye milako sa khalayi, weera Mwene a ovuwa avolowe.

¹⁰Mwene a ovuwa taani? Ti Yave a ikuru sootheene; ti Yave a ovuwa. Sela*