Read Makhuwa-Shirima Icipo 25 Bible Online

Icipo 25 - Makhuwa-Shirima bible

Icipo 25

¹Ya Davide. Okumaaka ongwaasani Nyuwo, Yave;

²Ii! Mulukwaaka, kinoororomelani Nyuwo. Muhikihiye kiyevihiwaka hata amwiittanaaka ehikiwine.

³Ootheene anoororomelani Nyuwo anoopwaneya; vaheera yaale aneetta moota woovariha khampwaneya.

⁴Mukoonihere iphirosanyu Yave; mukixuttihe misewesanyu.

⁵Mukeettihe mweekhaikhaiyinimwanyu ni mukixuttihe, niwoko Nyuwo ti Muluku Mvuluxaaka ni miyo kinoororomelani mahuku ootheene.

⁶Yave, muupuwelele ikharari ni osivelawanyu otokotoko moonihenraanyu okhuma khalayi.

⁷Muhuupuwelele soottheka sa enamwanaaka ni iphirosaka soohiiwelela; mukuupuwelele mwa osivelawanyu, niwoko Nyuwo, Yave ti Ooreeraxa.

⁸Yave ti a murima wooreera ni a ekhaikhai, tivawo onaaxuttihaawe anamattheka iphirosawe.

⁹Owo ongweettiha oowiiyeviha mweekhaikhaiyini ni onaaxuuttiha ephirowaawe.

¹⁰Iphiro sootheene sa Yave ti soosiveleya ni soororomeleya wa yaale ankwanihera soonyesererihiwa sa wiiraanawawe.

¹¹Ii! Yave, mulevelele sootthekasaka sirookhalaru sitokotoko, mwaha wa Nsinanaanyu.

¹²Mutthu heeni ommoova Yave? Yave onoomuxuttiha ephiro heeni yookuxera.

¹³Owo onookhala mumpuhani ni ekhapiraawe eniyaakhele elapo.

¹⁴Yave onaathupululela ixiirisawe yaale ammoova; Owo onaasuweliha wiiraanawawe.

¹⁵Maithwaaka aningweha Yave mahuku ootheene niwoko Owo paahi ti onkikoongola munraakhoni.

¹⁶Mukirukunuwele ni mukimorele ikharari niwoko kiri meekhaaka ni oohooxeya.

¹⁷Soothanana sa murimaaka sohaatta, mukoopole wa soovalavelihasaka.

¹⁸Ngwehe soohooxasaka ni othananawaka ni mulevelele sootthekasaka sootheene.

¹⁹Moone moota amwiittanaaka yaattiyaaya ni moota ankithanyaxaaya.

²⁰Mwaakihe okumaaka ni mukoopole; muhikihiye kuulihiheyaka muru niwoko kintthawela wa Nyuwo.

²¹Ekhaikhai ni ororomeleya okaakiheke, niwoko kinimoororomelani.

²²Ii! Muluku, mvuluxe muloko wa aYixrayeli mwa soohoxasaya sootheene!