Read Makhuwa-Shirima Icipo 27 Bible Online

Icipo 27 - Makhuwa-Shirima bible

Icipo 27

¹Ya Davide. Yave ti waarawaka ni ovuluxiwawaka — taani kineeraaka kimoove? Yave ti wootthawelawaka woolipa — taani aneera akoopopihe?

²Asilopwana oonanara yaakaattamelaka weera ekiphwate ni amwiittanaaka ootheene yaakiwananaka, awosa anookwakwathuwa, enamora.

³Naari anakhotto ancipale ekiricaka, murimaaka khoorwa woova; naari epaceraka okiwanano, hata hiiho, kinoororomela.

⁴Koomvekela Yave etthu emoha ni ti yeela kinaasaaka: kintthuna okhala Mpaani mwa Yave mahuku ootheene a okumaaka weera koone oreera wa Yave ni kamwaase Mpaanimwawe.

⁵Vano nihuku na mahooxo, Owo onookikosoopa nnenesene mpaanimwawe; Owo onookiipithiha mutabernaakulunimwawe* akiikaathiki oolipeene vamwalawawe.

⁶Vano kinimwaawina amwiittanaaka ankirica; vatabernaakuluniwawe* kinoopakela sooveleela kikhuwelaka ni ohakalala. Kinoomwiipela Yave kimuttottopelaka.

⁷Ii! Yave, mwiiwe nsunaka miyo kaakhuwelaka; mukimorele ikharari ni mukaakhuleke.

⁸Murimaaka oneera ha sa Nyuwo: “Mwaasaase ekhovaawe.” Ekhovaanyu, Yave, kinimwaasaasa.

⁹Muhikiipithihe ekhovaanyu naari muhimukhootte murumeiyaanyu musarani. Nyuwo ti namakhaviheraaka. Ii! Muluku Mvuluxaaka, muhikihiye naari muhikithaame.

¹⁰Naari atithaka ni amayaka ekihiyaka, Yave onookaakhela.

¹¹Mukixuttihe ephirowaanyu Yave; mukeettihe mmuseweni wookwanela niwoko na anamahooxaaka.

¹²Muhikinnyerere otthuna wa amwiittanaaka, niwoko anamoona oowootha ankoothera oosareyeene nipuhero.

¹³Hata hiiho, kooviriyeliwa ni seiya: kinimoona oreera murima wa Yave mweelaponi ya akumi.

¹⁴Mungweherere Yave, mukhale oolipa ni oominya murima; mungweherere Yave!