Read Makhuwa-Shirima Icipo 33 Bible Online

Icipo 33 - Makhuwa-Shirima bible

Icipo 33

¹Mmwiipele Yave ni ohakalala, nyuwosa oororomeleya. Ti woophwaneleya omuttottopela, nyuwosa a murima wooreera.

²Muntthapele Yave ni makita; mmwiipele ni lira* a ifiiyu muloko.

³Mmwiipele ecipo enyowani, mwiipe nnenesene ni munkhuweleleno ni ohakalala.

⁴Vano masu a Yave ti a ekhaikhai; Owo ti oororomeleya mwa sootheene ompakaawe.

⁵Yave onsivela ororomeleya ni ekhaikhai; elapo ya vathi yoosareyano osivelawawe woohimala.

⁶Erimu yaapattuxiwa ni nsu na Yave; ithenyerisaya saapattuxiwa ni iphumu sa eyanowaawe.

⁷Owo onthukumanyiha maahi a ephareiya nipuro nimoha; onghela mmattankhini moowiixera.

⁸Elapo yootheene ya vathi emooveke Yave; miloko sootheene sa mulaponi simuttittimihe Yoowo.

⁹Vano Owo aahuuluma ni sootheene saapakeya; Owo aalamula ni sootheene saakhumelela.

¹⁰Yave onooceeliha soovaanela sa miloko; onghiiha soowuupuwelasaya.

¹¹Vaheera soovaanela sa Yave sinkhala mahuku ootheene ni soowuupuwela sa murimaawe simpwaherera wa ikhapira sootheene.

¹²Wooreelihiwa ti muloko orino Yave ntoko Mulukwaaya; muloko Owo othanlalaawe weera okhale yoohiyeraawe.

¹³Yave ari wiirimu ongweha vathi awoonaka atthu ootheene a elapo ya vathi;

¹⁴vahiceniwawe onaaweha amaki ootheene a mulaponi.

¹⁵Ti Yoowo opanke mirima sa atthu ni onsuwela sootheene atthu ampakaaya.

¹⁶Khawoworu mwene omvuluxiwa niwoko na waatta wa anakhottwaawe naari khawoworu nakhotto ooweraxa omutthawa niwoko na ikurusawe sitokotoko.

¹⁷Ekavalu* engweherera siiyo woopola, naari ekhalanaka ikuru sitokotoko, kheengwera ovuluxa.

¹⁸Vaheera maitho a Yave angwoona yaale ammoova; yaale anroromela mwa osivelawawe woohimala.

¹⁹weera awoopole mookhwaani ni aathokorore mookumini mweehuhuni ya etala.

²⁰Hiyo nningweherera Yave munroromeloni; Owo ti Ekhaviherowaahu ni Yoowiixaakiheraahu.

²¹Mirimasahu sinimuhakalalela Yoowo, niwoko ninroromela mwa Nsinanawe Nootteela.

²²Ii! Yave, osivelawanyu woohimala okhaleke ni hiyo neenre noororomelani Nyuwo.