Read Makhuwa-Shirima Icipo 36 Bible Online

Icipo 36 - Makhuwa-Shirima bible

Icipo 36

¹Wa mutokweene a icipo, Ecipo ya Davide, murumeiyi a Yave. Aakhala masu mmurimanimwaka mwaha wa soottheka sa mutakhali: owo khammoovaru Muluku.

²Vano wootepaxa wiixoonawawe moota wooweera khanoona hata khanghiya sootthekasawe.

³Maswaawe ti oonanara ni oovariha. Owo khampwattha okhalano miruku naari opaka yooreera.

⁴Mpaka iixaatalenleene owo omvaanela soonanara; onthanla ephiro yootthekeya ahihiyaka yeeyo eri yoonanara.

⁵Osivelawanyu, Yave, wophiya mpaka wiirimu; ororomeleyawanyu mpaka mmahutteni!

⁶Ekhaikhaiyaanyu enlikana nyaako sitokotoko ni ororomeleyawanyu onlikana ntoko wiixera wa ephareiya. Ii! Yave, nyuwo munkosoopa omutthu nitho axinama ootheene.

⁷Ii! Muluku, osivelawanyu woohimala ti wootthuneyaxa! Atthu amphwanya wootthawelawo mmunttuusini wa mapuphaanyu.

⁸Awosa anca sa seiye saattiye Mpaanimwanyu ni munimwaavaha owura sa moolokwaanyu wa ohakalala.

⁹Vano mwa Nyuwo ookhala naattuuttu a okumi; ngwaaranimwanyu hiyo ninnamwaleeleya.

¹⁰Mpwaherere waasivelawanyu yaale yoosuwenleni; ekhaikhaiyaanyu wa yaale ari oororomeleya murima.

¹¹Muhitthunihere weera nnaawo na oowiixoona nikinyikale, hata ntata na mutakhali nikimoroxele vathi.

¹²Moone moota atakhali amoroxingwaaya, ehiweraka weemelatho!