Read Makhuwa-Shirima Icipo 38 Bible Online

Icipo 38 - Makhuwa-Shirima bible

Icipo 38

¹Ecipo ya Davide. Nivekelo. Ii! Yave, muhikihiiheke musaranimwanyu, hata muhikittaruxe moonyoonyiwanimwanyu.

²Vano mookihoma ni nyuupasanyu ni ntatananyu nookiphwanya.

³Niwoko na isarasanyu erutthwaaka yootheene yoovoreyeya ni mwaha wa sootthekasaka makhuvaaka khaanlipalipa.

⁴Koomireya niwoko na sootthekasaka, aani iya sookivikana.

⁵Makhwattaaka anunkhaxa ni ahuntta niwoko na ololowaaka.

⁶Ehuhu yootheene kineetta kooceelaka wiinuwa oothananeene. Aani nihuku nootheene kinaasa weetta kilalamikaka.

⁷Koosareya xipwexa; erutthwaaka yootheene yoovoreyeya.

⁸Nkinlipalipa kikhalaka oonyoongoweene; kinkhuwela ni murima woothananaxa.

⁹Soohaawelasaka sootheene ti soowoneya vamaithoniwanyu, Yave; Nyuwo munsuwela ohihimerawaka.

¹⁰Murimaaka onnakitthimaka; ikurusaka soolakaseya ni mpaka maithwaaka khaanoona nnene.

¹¹Asinthamwenaaka ootheene ankisemba niwoko na makhwattaaka; aximwaattamanaaka ankhala ottaiwaka.

¹²Yaale anaasa okumaaka ankireya ntapha; yaale antthuna okihasula anuuluma sa ophwatiwawaka. Nihuku ti nihuku annakivaanelela okivariha.

¹³Miyo kinkhala ntoko mutthu oowalana maaru aahiiwaka; ntoko mutthu oohuuluma ohingwera ohula eyanowaawe.

¹⁴Koothatuwa ntoko mutthu oohiiwa, mwa yoowo ohinaakhula etthu.

¹⁵Kinoowehererani Nyuwo Yave; Ii! Yave Mulukwaaka munookiiwa.

¹⁶Vano keenre: “Awosa ehikihakalalele naari ehikiwine miyo kaamoraka.”

¹⁷Miyo kihanle vakhaani omora ni kinnoona ovoreya nihuku ti nihuku.

¹⁸Kinlapa soonanarasaka ni koothananiheya ni sootthekasaka.

¹⁹Yaale ari amwiittanaaka aatepa waatta ni yaale ankithanya woohinthowa ari ancipale.

²⁰Yaale ankaakakhanyihera yooreera ni yoonanara ankuuluma miyo kaattharaka yeeyo eri yooreera.

²¹Ii! Yave, muhikihiyeke naari muhikirakamele, Mulukwaaka.

²²Ngweeke woowaakuveya weera mukikhavihere, Yave Mvuluxaaka.