Read Makhuwa-Shirima Icipo 4 Bible Online

Icipo 4 - Makhuwa-Shirima bible

Icipo 4

¹Wa mutokweene a icipo ni ikaruma sa mikhoyi. Ecipo ya Davide. Mukaakhule miyo kaakhuwelaka Mulukwaaka a ekhaikhai. Mukurunuxe othananawaka; mukimorele ikharari ni mwiiwe nivekelonaka.

²Mpaka yaakhani nyuwo asilopwana oowera muneeraanyu muhiye otatuxa ovuwawaka wuuliha muru? Mpaka yaakhani muneeraanyu musivele itthu soolokottha mwaasaasaka soowootha?

³Musuwele weera Muluku oomuthanla yoowo ori a murima wa omuluku; Yave anaakiiwe miyo kaamwiitthanaka.

⁴Nyuwo mwaanyoonyiwaka, muhittheke; mwiixaatalelaka, mutthokelele yeeyo ni mwiikurunuxe.

⁵Mvahe sooveleela sa ekhaikhai ni munroromele Yave.

⁶Ancipale ankoha: “Taani anaanoonihere yakhalaru etthu yooreera?” Munimwaleele ni waara wa ekhovaanyu, Yave.

⁷Moosariha murimaaka ni ohakalala opwaha wa yaale anghakalalela waatta wa etrigwaaya ni eviinyuwaaya.

⁸Kiniixaatalela, kinakona mmuretteleni niwoko ti Nyuwo paahi Yave munkikhaliha oolipeene.