Read Makhuwa-Shirima Icipo 40 Bible Online

Icipo 40 - Makhuwa-Shirima bible

Icipo 40

¹Wa mutokweene a icipo. Ecipo ya Davide. Koongweherera Yave ni ovilela; Owo ookiweha, aniiwa okhuwelawaka.

²Ookikhumiha muhimeni ya ophwata; murattani na ittoko. Aakeemexa vamwala akivahaka nipuro noolipa weera keemele.

³Aakivaha ecipo enyowani; ecipo yoomutthapela Mulukwaahu. Ancipale animoona yeeyo, yooveke ni anoomuroromela Yave.

⁴Ooreelihiwa ti yoole onimuroromela Yave; yoole ohinaatthara oowiixoona, hata ohintthara miluku soolokottha.

⁵Yave, Mulukwaaka, sootikhiniha mumpakaanyu ti sincipale. Soowuupuwelasanyu sooreera mwaha wa hiyo ti soohaalikeleya. Kaatthuna wuuluma ni olaleiya sa seiye, nkingwera, seenre saattaxa.

⁶Khamuntthuna sooveleela soohiyanahiyana, mene moothorola maaruwaaka. Khamuntthuna sooveleela soohisa ni sa soottheka.

⁷Vano keenre: “Miyo kiri va — yeeyo elempwale mulivuruni ti mwaha wa miyo.

⁸Kintthuna opaka otthunawanyu Mulukwaaka; Nlamulonanyu nri mmurimanimwaka.”

⁹Kinlaleiya ekhaikhai mmuthukumanoni mutokotoko; nkimmaala, Yave, ntoko musuwenlaanyu.

¹⁰Nkiniipithiha ekhaikhaiyaanyu mmurimanimwaka; kinuuluma sa ororomeleyawanyu ni ovuluxawanyu. Nkiniipithiha osivelawanyu naari ekhaikhaiyaanyu mmuthukumanoni mutokotoko.

¹¹Muhikikhoottihere ikhararisanyu Yave; osivelawanyu ni ekhaikhaiyaanyu ekaakihe mahuku ootheene.

¹²Vano sookacamiha soohaalikeleya sookirukureera; sootthekasaka sookiphwanya ni nkingwera woona. Seiye sohaattaxa opwaha mayihaaka ni murimaaka wooporora.

¹³Yave, woosiveleni okitapuxa; Ii! Yave mwaakuveke weera mukikhavihere.

¹⁴Ootheene anaasa okumaaka yuulihiheyeke muru ni erukureeriheiyeke muru; ootheene antthuna ophwatiwawaka ehokoloweke oonyooseyeene.

¹⁵Yaale ankeerela: Ahe! Ahe! yiituthuwe niwoko na erisaaya.

¹⁶Vaheera ootheene angwaasani ehakalale mwa Nyuwo; yaale ansivela ovuluxawanyu yeere mahuku ootheene: “Atthapeliwe Yave!”

¹⁷Vano wa miyo, ti oohaawa ni oothoiwa. Hata hiiho Yave onnikitthukuruwela. Nyuwo ti ekhaviherowaaka ni woopoliwawaka. Ii! Mulukwaaka, muhipise!