Read Makhuwa-Shirima Icipo 42 Bible Online

Icipo 42 - Makhuwa-Shirima bible

Icipo 42

¹Wa mutokweene a icipo. Ecipo ya miruku ya anamwane a Kora. Okumaaka onoohaawelani Nyuwo, Muluku, ntoko ekhomaci enghaawela maahi oovira.

²Okumaaka onimuhaawela Muluku, aani Muluku Mukumi. Nkivolowe yaakhani weera kiixoonihere wa Muluku?

³Yoocaaka ti maithori othana ni ohiyu, atthu ekikohaka nihuku nootheene: “Mulukwaanyu ori woowi?”

⁴Kuupuwelelaka itthu iye, kinniinla oothananeene, niwoko miyo kaakhovelela orowa ni muloko kihoolelaka wookela Mpaani mwa Muluku. Naavolowamo niipaka icipo sa ohakalala ni sa oxukurela variyari wa atthu a efesteene yeele.

⁵Ii! Okumaaka — muthananenle heeni? Munriipeliwa heeni murima? Munroromele Muluku, niwoko kinoomutthapela Yoowo, Mvuluxaaka ni

⁶Mulukwaaka. Koothananaxa, tivawo kingwuupuwelelaakani, okhuma elapo ya oYordanu, mmanyaakoni sa oHeremoni mpaka vamwaako oMizari.

⁷Moowiixera oniitthana moowiixera moorumani wa ekhuli; mitekuteku soowali sookikhuneela.

⁸Khula othana Yave onkoonihera osivelawawe ni khula ohiyu ecipowaawe enkhala ni miyo — ti nivekelonaka wa Muluku a okumaaka.

⁹Kaamweerela Muluku Mwalaaka: “Heeni munkittiwalaanyu? Nkivenyereke heeni kaasaka weetta ni kilalamikaka, amwiittanaaka ekihasulaka?”

¹⁰Otthebwa wa amwiittanaaka omvolowa mpaka mmakhuvanimwaka. Mahuku ootheene annakikoha: “Mulukwaanyu ori woowi?”

¹¹Ii! Okumaaka — muthananenle heeni? Munriipeliwa heeni murima? Munroromele Muluku, niwoko kinoomutthapela Yoowo, Mvuluxaaka ni Mulukwaaka.