Read Makhuwa-Shirima Icipo 44 Bible Online

Icipo 44 - Makhuwa-Shirima bible

Icipo 44

¹Wa mutokweene a icipo. Ecipo ya miruku ya anamwane a Kora. Ii, Muluku! Nohiiwa ni maaruwaahu; makholowaahu yaanithalihera seiye mwaapankaanyu mmahukunimwaya; ehuhuweene yeele ya khalayi.

²Mohoomola miloko ni matataanyu, munaamakiha makholowaahu mulaponimwaya. Mwaaphwata miloko munaakhaliha nnenesene makholowaahu.

³Awosa khayaawinne elapo ni ikatanasaya naari ni ikurusaya; mwaari Nyuwo mwaawinne ni ntatananyu noolopwana, moonowaanyu ni waara wa ekhovaanyu mweenre mwaasivela.

⁴Nyuwo ti Mwenaaka ni Mulukwaaka, ti Nyuwo muningwiniha Yakobe.

⁵Mwa Nyuwo ningwoomola amwiittanaahu; mwa Nsinananyu nnaanyikalasa yaawo anniwanano.

⁶Nkinroromela muupaaka ni ekatanaaka kheenkiwiniha.

⁷Vaheera Nyuwo munnivaha waawina amwiittanaahu; Nyuwo mungwuulihiha muru yaale annithanya.

⁸Ehuhu yootheene nnimvuwiha Muluku ni nnoottottopela Nsinananyu mahuku ootheene. Sela*

⁹Wa soothesene, vano moonihiya ni mooniyeviha; khamunaahoola anakhottwaahu.

¹⁰Moonihiya naatthawaka amwiittanaahu ni yaale anithannye aanihuhula.

¹¹Mooninnyerera weera ninyaanyiwe ntoko ikhondoolo ni moonimwaraxela variyari wa miloko.

¹²Moothumiha mulokwaanyu wa musurukhu vakhaani muhiwinaka moothumihanimwanyu.

¹³Mooniyeviha vamaithoni wa aximwaattamanaahu; nootthebwiwa ni nootheiwa ni yaale ari mukhwipimwahu.

¹⁴Moonitatuxa oopuheriwa vamaithoni wa miloko; awosa yaanoonaka, ampukunya muru.

¹⁵Ehuhu yootheene kinnahaawa oyevihiwa ni ekhovaaka yookimora

¹⁶niwoko na matthebwa a yaale ankuuluma ni ankithanya, aani, niwoko na amwiittana ankiinlela ikukuttula.

¹⁷Sootheene seiye sinikhumelenle hiyo nihoottiwanleni naari nihihiyale wiiraanawanyu.

¹⁸Mirimasahu khasinghokoleela ottulu ni inaawosahu khasinghapuwa mphironimwanyu.

¹⁹Wa soothesene, mooniphwata munitatuxaka nipuro ankhalaayawo akhwatte. Moonikhuneela ni epiphi yooripihana.

²⁰Hiyo naattiwanle Nsina na Mulukwaahu hoye hoye neemexenre matataahu miluku sikina soolokottha,

²¹vekhaikhai Muluku aamoona yeeyo eenre asuwela ixiiri sa murima.

²²Wa soothesene, niwoko na Nyuwo okhwa ori ohoolowahu ehuhu yootheene; nnooniwa ntoko ikhondoolo sinroihiwa owiiviwani.

²³Ii! Yave, mvenye! Heeni munkonaanyu? Mwemele! Muhinihiye mahuku ootheene.

²⁴Muniipithihera heeni ekhovaanyu muttiwalaka ohaawawahu ni ohasuliwawahu?

²⁵Hiyo noomoroxeliwa vathi; irutthusahu siri puruwuru.

²⁶Mvenye ni munikhavihere. Munivuluxe niwoko na osivelawanyu woohimala.