Read Makhuwa-Shirima Icipo 45 Bible Online

Icipo 45 - Makhuwa-Shirima bible

Icipo 45

¹Wa mutokweene a icipo, yiipiwa ettharihiwaka ecipo eniitthaniwa Ethutu. Ecipo ya anamwane a Kora. Ecipo ya okwatti. Murimaaka wootaviwa ni masu ooreeraxa miyo kimuthaliheraka mwene maswaaka a ecipo; nluminaka nri ntoko nipururu na namalepa ooratta.

²Nyuwo ti mutthu oosuwanyeyaxa ni eyanowaanyu yoottikittheliwano mahala, eenre Muluku ooreelihani mahuku ootheene.

³Ii, Namaweraxa! Muherere ekatanaanyu muyuununi; mwiiwariheno ovuwa ni waaraxa.

⁴Mutthimake moovuwanimwanyu moowineya niwoko na ekhaikhai, ikharari ni ororomeleya. Ntatananyu noolopwana niwereke miteko sootikhiniha.

⁵Nyuupasanyu soowiithihiwa sihomeke mirima sa amwiittana a mwene; miloko simoreleke vathi wa inaawosanyu.

⁶Ehicaanyu ya emwene, Muluku, enoopwaherera mahuku ootheene; ekopo ya emwene ya ekhaikhai enookhala ekopo ya omwenaanyu.

⁷Nyuwo munsivela ekhaikhai muthanyaka sootakhala. Tivawo Muluku Mulukwaanyu oothanlalaaweni variyari wa asikhwiinyu oottikitthelakani makhura a ohakalala.

⁸Soowarasanyu sootheene sinunkhela makhura a emira*, alowe* ni kasiya*; mpaani mwa emwene sicaambuliweeneno maino a itthepo, oruma wa ikaruma sa ecipo onoohakalalelani.

⁹Anamwane asithiyana a mamwene ari eriyari ya asithiyanaanyu a oneethi; moonowaanyu woolopwana ori ootthomeriwa a mwene awanreene eyuuma yoorikaxa ya wOfiri.

¹⁰Mwiiwe, mwaana muthiyana, mooneke ni mwiiwexexe. Muttiwaleke mulokwaanyu ni empa ya atithinyu.

¹¹Mwene ootthukeya ni oreerawanyu. Munttittimihe niwoko ti pwiiyaanyu.

¹²Mwaana muthiyana a oTiro onooruuha yoovaha; atthu arino mihakhu sincipale animwaasa murimaanyu wooreera.

¹³Mwaana muthiyana a mwene ti oosareya waara mukwartunimwawe. Ikuwosawe sootthaveliwa eyuuma yoorikaxa.

¹⁴Awanreene mikaandyo sooxoraxoriwa owo onroihiwa wa mwene; asikhwaawe oowiikosoopa animutthara; ootheenaawo anrowa vamaithoni wa mwene.

¹⁵Awosa aneetta ehakalalanxeene evolowaka vaate wa mwene ootteeliweene.

¹⁶Anamwaniinyu asilopwana anookuxa ehice ya asitithaya; munimwaakhaliha anamwane a mwene mweelaponi yootheene.

¹⁷Kinoopwahereriha wuupuweleliwa nyuwo wa khula ekhapira; tivawo miloko sineeraaya sootthapeleni mahuku ootheene.