Read Makhuwa-Shirima Icipo 46 Bible Online

Icipo 46 - Makhuwa-Shirima bible

Icipo 46

¹Wa mutokweene a icipo. Ecipo ottharihiwaka moota oniitthaniwa Alamoti*. Muluku ti Wootthawelawahu ni ikurusahu; ekhavihero yoohimala mweehuhuni ya makacamiho.

²Tivawo nihinoovaahu naari elapo etetereyaka ni nyaako simireyaka mphareiyani,

³mitekutekusaya sirumaka ni owali ni nyaako sittikinyeyaka moonyoonyiwanimwaya.

⁴Wookhala mooloko mirorasaya singhakalalela esidade ya Muluku, Nipuro Nootteela* onkhalaawewo a Musulusulu.

⁵Muluku ori mwemmo. Kheerwa ettikinyeya. Muluku onimoowa weera akhavihere waaxaaka.

⁶Miloko soonyakuleleya; omwene onnamoramora; Muluku ookhuwela ni elapo ya vathi enootetereya.

⁷Yave a ikuru sootheene ori ni hiyo; Muluku a Yakobe ti nipuronahu noolipaxa. Sela*

⁸Ngweeke ni mooneke miteko sa Yave, milepe oruuhalaawe mulaponi.

⁹Owo ommaliha ikhotto mulaponimu yootheene; Owo onintaka nyuupa anyaanyaka mavaka ahisaka ixikudu* ni mooro.

¹⁰Mmaaleke ni musuwele weera Miyo ti Muluku. Kinoovuwihiwa variyari wa miloko; kinoovuwihiwa mweelaponimu.

¹¹Yave a ikuru sootheene ori ni hiyo; Muluku a Yakobe ti Nipuronahu Noolipaxa. Sela*