Read Makhuwa-Shirima Icipo 48 Bible Online

Icipo 48 - Makhuwa-Shirima bible

Icipo 48

¹Ecipo ya anamwane a Kora. Mutokweene ti Yave omphwanela ottottopeliwa wootheene musidadeni mwa Mulukwaahu, vamwaakoniwawe wootteela.

²Mwaakweene yoowo ti wooreeraxa — ohakalala wa elapo ya vathi yootheene. Mwaako Siyoni, esidade ya Mwene Mutokweene, ori ntoko itthomela sa mwaako Zafoni.

³Muluku ori mmapuronimwaya oolipaxa; Owo oniixoonihera ntoko Wootthawelawaya.

⁴Mamwene aawaandyeerera anakhottwaaya weera erowele vamoha esidade.

⁵Vaheera yoonakaru yaattenguwa; yaatthawa oowooveene.

⁶Othukumela waahaaphwanyawo; yaavoreiwa ntoko muthiyana ahaleelaka oyara.

⁷Nyuwo mwaaphwata ntoko makula matokotoko a oTarsisi oophwatiwa ni epheyo ya ninkhuma nsuwa.

⁸Ntoko niiwalaahu, vano nohoona musidadeni mwa Yave a ikuru sootheene, musidadeni mwa Mulukwaahu: Muluku munlipiha mahuku ootheene.

⁹Mpaanimwanyu, Yave, hiyo nintthokelela sa osivelawanyu woohimala.

¹⁰Soottottopeleyasanyu sookwanela ekotenle elapo — hiiho ntoko Nsinananyu; ntatananyu noolopwana noosareya ororomeleya.

¹¹Mwaako Siyoni onghakalala; mittetthe sa oYuda sintthapa niwoko na soolakelasanyu sa ekhaikhai.

¹²Mweetteette mukhwipi moothemwene mwa oSiyoni ni mwaalikele itoore* sootheene;

¹³ngwehawehe nnenesene soowiixaakiherasaya ni mapurowaaya oolipaxa weera muthalihere sa seiyo ikhapira sa muhoolo.

¹⁴Vano Muluku owo ti Mulukwaahu mahuku ootheene; Owo onookhala Namweettihaahu mpaka ommaleloni.