Read Makhuwa-Shirima Icipo 51 Bible Online

Icipo 51 - Makhuwa-Shirima bible

Icipo 51

¹Wa muhusiha a icipo. Ecipo ya Davide ehuhuweene yeele mprofeeti Natani aamwaattamenlaawe Davide ararungweene ni Batixeba. Ii, Muluku! Mukimorele ikharari niwoko na osivelawanyu woohimala; mucipihe sootthekasaka soonanara niwoko na murimaanyu wooreera.

²Mukirapihe wa soonanarasaka sootheene ni mukitteelihe wa sootthekasaka.

³Vano kinsuwela sootthekasaka soonanara ni soohiyanyihasaka sinnakittharatthara.

⁴Kohootthekelani Nyuwo paahi, kipakaka yeeyo eri yoonanara vamaithoniwanyu moota wooweera nthorihelonanyu ti na ekhaikhai ni moophwanela okittaruxa.

⁵Vekhaikhai kiri namattheka eyareliwaaka; aani okhuma ehuhu yaakirupanlaaya amayaka.

⁶Koosuwela weera muntthuna woona ekhaikhai mpuwamwaka; munkixuttiha miruku mmurimanimwaka.

⁷Mukitteelihe ni hisopo* ni kinootteeliheya; mukirapihe ni kinookhala ootteelaxa opwaha etthabwe.

⁸Mukiiwihetho ohakalala ni otteeliwa murima; makhuva mwaapwenxaanyu ehakalaleke!

⁹Mwiipithihe ekhovaanyu wa sootthekasaka ni mucipihe soonanarasaka sootheene.

¹⁰Ii Muluku! Mpattuxe murima wootteela mpuwamwaka ni mukirehererele munepa woohihoveleya.

¹¹Muhikoomole vamaithoniwanyu hoye hoye muhikivenxere Munepaanyu Wootteela.

¹²Mukitthunihereke woonatho ohakalala wa ovuluxawanyu ni mukilipihere ni murima woolikaneene wiiwelela.

¹³Vano kinimwaaxuttiha ephirowaanyu atakhali ni anamattheka anoohokoleela wa Nyuwo, Muluku.

¹⁴Ii! Muluku, Nyuwo munkoopola, mukivuluxe mmathowani a ephome ni nluminaka nnoolaleiya ororomeleyawanyu.

¹⁵Ii! Yave, mukivaheke masu ni eyanowaaka enoolaleiya ottottopeleyawanyu.

¹⁶Mwaatthuna sooveleela hoye hoye sooveleela soohisa, saano kooruuhenleeneni.

¹⁷Sooveleela Muluku ontthunaawe ti munepa woosareya olapa; Nyuwo, Muluku khamunramusa murima woorukunuwa ni woowiiyeviha.

¹⁸Niwoko na murimaanyu wooreera, mweettiherele nnene oSiyoni; murasele exiri ya oYerusaleemu.

¹⁹Vano nsikhale sooveleela sa ekhaikhai; sooveleela soohisa soohiyanahiyana weera soohakalaliheni. Aani imombe ilopwana sinoopakeliwa sooveleela valtaariniwanyu.