Read Makhuwa-Shirima Icipo 55 Bible Online

Icipo 55 - Makhuwa-Shirima bible

Icipo 55

¹Wa muhusiha a icipo ni ikaruma sa mikhoyi. Ecipo ya miruku ya Davide. Ii! Muluku, mwiiwe nivekelonaka; muhiramuse wiidyoonttelelawaka.

²Mukiiwe ni mukaakhuleke. Soowuupuwelasaka soosareya milattu ni kooriipiwa murima

³woowiiwa onyakula wa amwiittana ni okhuwela wa atakhali. Awosa anaandyeerera ohaawawaka, ekithanyaka musaranimwaya.

⁴Murimaaka onookitthimaka, woopiha wa okhwa wookiphwanya.

⁵Woova ni othukumela wookisareya; woovaxa wookivara.

⁶Keenre: Ii! Kaarino mapupha ntoko ekhunda, kaamvava weera kiitthuuwe;

⁷aani kaamtthawela ottaiwenexa, kikhalaka munikareni. Sela*

⁸Kaamwaakuvela ophwanya nipuro nootthawela, ottai wa isara sa epheyo ni ettheku.

⁹Ii! Yave, mwaarukureerihe nyuru atakhali; muvirikanyihe muulumelowaaya, niwoko kinoona opuhera ni owana musidadeni.

¹⁰Ohiyu ni othana anneetta muxirinimwaya; soonanara ni sootakhala siri musidade.

¹¹Ikuru soophwata simvara muteko musidadeni; soowoopiha ni soowootha siri mmuseweni ehuhu yootheene.

¹²Mwiittana aakiruwanne, kaamvilela; ngwanani aakiwananne, kaamwiixaakiha.

¹³Vaheera ti nyuwo kineettanaaka, mukhwaaka ni nthamwenaaka xaxaxa,

¹⁴mwa nyuwo keettaakano mmuretteleni wooreeraxa naarowaahu vamoha ni atthu ancipale wa Empa ya Muluku.

¹⁵Okhwa waaphwanye amwiittanaaka wootutuxereya; awosa ekhuruwele munihiyeni ereeneno okumi, niwoko soonanara simmaka variyariwaya.

¹⁶Vaheera miyo kimmwiitthana Yave ni Owo onookoopola.

¹⁷Wiilaka, oxeexelo ni othana kinnakhuwela moothanananimwaka ni Owo onniiwa nsunaka.

¹⁸Owo onkoopola woomalela mukhottoni arookhalaru ancipale yaale ankiwanano.

¹⁹Muluku mwa Yoowo onlamula wa mahuku ootheene onookiiwa ni onimwaattaruxa. Sela* Awosa ari asilopwana ahinceendyaru mweettelowaaya ehimoovakaru Muluku.

²⁰Mukhwaaka oningwanano nthamwenaawe; owo onnanariha wiiraanawawe.

²¹Maswaawe ari oonyekettheya, mene mmurimwanimwawe yookhala ekhotto; maswaawe ankhala ntoko ooreeraxa ereene ikatana soowiitha.

²²Mmwinnyerere Yave soocecewukasanyu ni Owo onimookosoopani; Owo khatthuniheraru weera oororomeleya amore.

²³Vaheera Nyuwo, Muluku, munaakuruxela atakhali munlittini na ophwata. Anamapuhera ni anamwiiva khaankwanihera eriyari ya mahukwaaya a okumi. Wa soothesene, wa mpattaaka, kinoororomelani Nyuwo.