Read Makhuwa-Shirima Icipo 56 Bible Online

Icipo 56 - Makhuwa-Shirima bible

Icipo 56

¹Wa muhusiha a icipo. Ecipo entthara moota woowiipa oniitthaniwa “Ekhunda mmwirini wa ekaravalyu* yoorakamela.” Ecipo ya Davide eniitthaniwa Mikitami*. Ecipo ela yaalempwale ehuhuweene yeele aFilisti yaamvanraaya Davide oGati. Ii! Muluku, mukimorele ikharari, niwoko atthu annakittharelelaxa; ehuhu yootheene annakiwanano ekihasulaka.

²Yaale ankaapa annakittharelela ehuhu yootheene. Ancipale ankiwanano ngwiixoonanimwaya.

³Miyotho, koovaka, nkoororomeleni Nyuwo.

⁴Mwa Muluku, mwa Yoowo maswaawe kintthapelaaka, mwa Muluku Owo kinnimuroromela ni nkoova. Anaakipakeleni mutthu onkhwa?

⁵Ehuhu yootheene annavaanya maswaaka; ankuupuwelela weera ekinanarihe.

⁶Awosa amvaanela, anniireherera otuphela kimviraakamo, angwehaweha malipaaka — oolikaneene okiiva.

⁷Muhaahiyeru etthawaka atakhali awo; Ii! Muluku, mphwate miloko moonyoonyiwanimwanyu.

⁸Muupuwelele olalamikawaka; mulepe maithoraaka mpaphelonimwanyu — vekhaikhai alempwale mulivurunimwanyu.

⁹Miyo kaamvekelaka ekhavihero Muluku, amwiittanaaka anoohokolowa. Hiiho kinoosuwela weera Muluku ori ni miyo.

¹⁰Kinimuroromela Muluku, mwa Yoowo maswaawe kintthapelaaka, mwa Yave, mwa Yoowo maswaawe kintthapelaaka —

¹¹kinimuroromela Muluku. Nkoova — anaakipakeleni mutthu onkhwa?

¹²Ii! Muluku! Seiyo koororomelinghaakani kintthuna okwanihera; kinimoopakelani sooveleela sootthapela.

¹³Nyuwo mookoopola mookhwaani ni inaawosaka weera sihikwakwathuwe keette vamaithoni wa Muluku ngwaarani wa okumi.