Read Makhuwa-Shirima Icipo 60 Bible Online

Icipo 60 - Makhuwa-Shirima bible

Icipo 60

¹Wa muhusiha a icipo. Ecipo entthara moota woowiipa oniitthaniwa “Ethutu ya wiiraana.” Ecipo ya Davide eniitthaniwa Mikitami*. Ecipo ela yaalempwale ehuhuweene yeele Davide aawanannaaweno awArami Naharayimi ni awArami Zoba; ehuhuweene yeele Yowabe aahokolongwaawee aavulalihaka awEdomi 12 000 vanreyareyani na Maakha. Ii! Muluku, moonikhootta; moophwata yoowiixaakiheraahu; Nyuwo moonipattihera isarasanyu. Vano munihokoloxeretho wa Nyuwo.

²Mooteterexa etthaya enathaleya — muttiye mitarisaya niwoko enookomowa.

³Mooviriha mulokwaanyu mweehuhuni soohooxa; moonivaha eviinyu yoorukureeriha muru.

⁴Vaheera mooweemexera eneneero yaale angwoovani weera etthawe nyuupa.

⁵Munivuluxe ni munikhavihere ni ntatananyu noolopwana weera yaale munaasivelaanyu yoopowe.

⁶Muluku ohuuluma vanipuroniwawe nootteela: “Moowinanimwaka kinookawa oXekhemi, kinooringa nreyareya na oSukota.

⁷oGiliyade ni oManaxe ti wawaka; wEfrayimi ti ekapaseetaaka ni oYuda ti ekopowaaka yoolamulela.

⁸oMowabe ti ebasiyaaka kinsuusulelaaka ni wEdomi kimvonyeraakawo ikwakwattasaka; wa oFilistiya kinkhuwelela owinawaka.”

⁹Taani anaakironghe osidade yoolipihiwa? Taani anaakihoole wEdomi?

¹⁰Vekhaikhai ti Nyuwo Muluku munikhoottiye, muhaahoolaka anakhottwaahu.

¹¹Munikhavihere ni amwiittanaahu niwoko ekhavihero ya atthu kheemvareleya muteko.

¹²Kinoowina ni ekhavihero ya Muluku ni Owo onimwaanyikalela amwiittanaahu.