Read Makhuwa-Shirima Icipo 63 Bible Online

Icipo 63 - Makhuwa-Shirima bible

Icipo 63

¹Ecipo ya Davide aaraawe munikareni na oYuda. Ii! Muluku, Nyuwo ti Mulukwaaka — ni murima wootheene kinoowaasani. Okumaaka onoohaawelani ni ekhalelowaaka yootheene enootthunani Nyuwo mweelaponi yoowuumaxa yoohikhala maahi.

²Koowoonani vaNipuroni Nootteela*, kiwehawehaka ikurusanyu ni ovuwawanyu.

³Eyanowaaka enoovuwihani niwoko osivelawanyu ti wooreerela opwaha okumi.

⁴Kinimoottottopelani mahuku ootheene a okumaaka ni mwa Nsinananyu kinimweemexa matata.

⁵Okumaka onoohakalala ntoko ociiye yooca yoosivaxa. Kinimoottottopelani ni eyano yoosareya ohakalala.

⁶Vakaamaniwaka kingwuupuwelelani Nyuwo; ohiyu wootheene kintthokelela sa Nyuwo.

⁷Mweenre mukhala ekhaviherowaaka, kiniipa ni ohakalala vamunttuusini wa mapuphaanyu.

⁸Okumaaka onoovarexexani Nyuwo; Ntatananyu noolopwana ninkilipiha.

⁹Vaheera yaale anaasaasa okumaaka anoophwatiwa; anoomorela mulittini noowiixeraxa.

¹⁰Animwinnyereriwa weera yiiviwe ethatuwaka hiiho sooca sa akhwatte.

¹¹Vaheera mwene onoomuhakalalela Muluku. Ootheene yaale anlipela mwa Nsina na Muluku anoomuttottopela, mene iyano sa anamootha sinoomaalihiwa.