Read Makhuwa-Shirima Icipo 66 Bible Online

Icipo 66 - Makhuwa-Shirima bible

Icipo 66

¹Wa Muhusiha a icipo. Ecipo emoha. Munkhuwelele Muluku ni ohakalala, elapo ya vathi yootheene!

²Mwiipe sa ovuwa wa Nsinanawe. Munttottopele moota woovuwaxa!

³Mmweereleke: “Mitekosanyu ti sootikhiniheyaxa! Ikurusanyu ti sitokotoko moota wooweera amwiittanaanyu aniipurula ohoolowanyu.

⁴Elapo ya vathi yootheene enookokhorelani Nyuwo. Amakaaya angwiipelani icipo soottottopela; animwiipa icipo soottottopela Nsinananyu.” Sela*

⁵Ngweeke ni moone yeeyo Muluku opankaawe. Miteko aapakenlaawe atthu ti sooreeraxa.

⁶Aatatuxa ephareiya etthaya yoowuuma ni awo yaalapuwa vathi; ngwe, nimuhakalalele.

⁷Owo onlamula wa mahuku ootheene ni ikurusawe; maithwaawe angwehaweha miloko. Anamapuhera ehingwaneno. Sela*

⁸Ii! Miloko, munttottopele Mulukwaahu. Icipo sa omuttottopelawahu siiwiweke!

⁹Owo ohoopola okumaahu ahitthuniheraka weera inawosahu siserenguwe.

¹⁰Vano Nyuwo, Muluku moonoota murima; moonitteeliha ntoko entotoxiwaaya ereheriwaka eparatha*.

¹¹Moonimoroxela mutaphani munanithateliha mirindi soolemela.

¹²Mwaahaatthunihera atthu oninyikalela nyurusahu; naavira mmooroni ni mmaahini, mene ommaleloni Nyuwo mooniphiiha vanipuroni nooruwereya.

¹³Kinoovolowa Empaanyu Yootteela kikuxaleene sooveleela soohisa, kikwanihereke malipelo koopakenlaakani.

¹⁴Ti malipeloweene yaale kaaroromelinghaaka ni kuulumaaka xaxaxa kaaraaka moovalavelani.

¹⁵Kinimoopakelani sooveleela sa axinama ooneneva ni sa anapunci mwa yaawo mwiixaaya onootthuwela wa Nyuwo vamoha ni sa imombe ilopwana ni sa ipuri. Sela*

¹⁶Ngweeke ni mwiiwe, ootheene nyuwo mummoova Muluku; mukihiye koothalihereni yeeyo okipakenlaawe.

¹⁷Kaamukhuwelela Yoowo ni eyanowaaka; koomuttottopela ni nlumi.

¹⁸Kaathokoronre soottheka mmurimanimwaka, Yave khaakiiwa.

¹⁹Vaheera vekhaikhai Muluku ookiiwa, aakhulaka nivekelonaka.

²⁰Muluku atthapeliwe niwoko khakhoontte nivekelonaka ni ohoonihera okisivelawawe.