Read Makhuwa-Shirima Icipo 68 Bible Online

Icipo 68 - Makhuwa-Shirima bible

Icipo 68

¹Wa muhusiha a icipo. Ecipo ya Davide. Muluku aweemelele ni amwiittanaawe emwaraxiwe; aani awosa etthaweke ohoolowawe.

²Nyuwo mwaalakaseihe ntoko epheyo enlakaseihaaya mwiixi. Ntokotho nnyoma nintothowaaya mukerekhere mooro, hiiho eriheye atakhali vamaithoni wa Muluku.

³Oororomeleya ehakalaleke vancipale vamaithoni wa Muluku; awosa ekhaleke oosareya ohakalala.

⁴Mmwiipele Muluku; mwiipe icipo soottottopela Nsinanawe. Mumvuwihe Yoowo oneetta mmahutteni. Nsinanawe ti Yave. Muhakalaleke ohoolowawe.

⁵Tiithi a akwaasuni ni Namwaakiha a asinaamukhweli ti Muluku vaNipuroniwawe Nootteela*.

⁶Wa anamwiixeetta Muluku onnaavaha emusi. Onnaatapuxa anamatthukiwa weera epuhe, mene anamapuhera ankhala mweelaponi yoowuumelela.

⁷Ehuhuweene yeele Nyuwo mwaahoolenlaanyu mulokwaanyu, Muluku, mwaavinraanyu munikareni, Sela*

⁸vano etthaya yaatetereya ni erimu yaarupiha epula ohoolo wa Muluku, Yoole a oSinayi; ohoolo wa Muluku ori Muluku a oYixrayeli.

⁹Mwaavaha epula yoowaattaxa Muluku, mwaariiriha yoohiyeraanyu yaakhulumungwe.

¹⁰Mulokwaanyu waahiitekihamo ni mwaahaavaha oohaawa sooreerela sootthuneyaxa niwoko na murimaanyu wooreera.

¹¹Yave aahuuluma masu ni anamitthenga ancipale yannalaleiya:

¹²“Mamwene ni anakhottwaaya antthawa woowaakuveya ni asilopwana ankawa soohuhula.

¹³Hata mwaakonaka mukerekhere maikho wa waakonelingwe, mapupha a ekhundaaka aahuruweleliwano eparatha*; mapururuwaaya ni eyuuma yoowaara.

¹⁴Muluku a ikuru sootheene aamwaranxaawe mamwene mweelaponi, waari ntoko etthabwe vamwaako oZalemoni.

¹⁵Nyaako sa oBaxani ti nyaako soorakamaxa; soovinavineya ti nyaako sa oBaxani.

¹⁶Ii! Nyaako soovinavineya! Mungweherani ni nrima mwaako Muluku oothanlalaawe weera akhalewo, mwa weiwo Yave muneenaawe ommakaawewo mahuku ootheene?

¹⁷Ikaaro sa ikavalu* sa Muluku ti soohaalikeleya. Yave onrwa mwemmo akhumaka oSiyoni wa Nipuronawe Nootteela*.

¹⁸Mwaawenlaanyu moowinani osulusulu weera mwakhalewo, Yave Muluku, mwaahaakuxa anamatthukiwa ancipale. Mwaawaakhela atthu ntoko yoovaha — mpakatho anamavaanya.

¹⁹Yave, Muluku ni Mvuluxaahu atthapeliwe, mwa Yoowo omvilela soolemelasahu khula nihuku. Sela*

²⁰Mulukwaahu ti Muluku omvuluxa. Owo ti Namalamula muneene; Owo ti Yave onnitapuxa mookhwaani.

²¹Vekhaikhai, Muluku onooswanya nyuru sa amwiittanaawe; makarakasa oohileeleya a yaale ampwaherera mootthekanimwaya.

²²Yave oneera: "Kinimwaahokoloxera oBaxani; kinimwaahokoloxera moowiixera mwa ephareiya

²³weera nyuwo muruweye inawosanyu mphomeni mwa amwiittanaanyu, mwa yeeyo malumi a alapwaanyu eneeraaya ekhaleno woolata.”

²⁴Ii! Mulukwaaka ni Mwenaaka ti woowooneya weettawanyu woowineya. Atthu ammoona Muluku arowaka wa Nipuro Nootteela*.

²⁵Anamwiipa a icipo anrowa muhoolo ni vahoolowaya anakaruma a icipo vamoha ni asimwali ewiipaka akarakaxa.

²⁶Munttottopele Muluku mmuthukumanoni mutokotoko; munttottopele Yave muloko wootheene wa aYixrayeli.

²⁷Moone, ohoolo eri epuumba ekhaani ya Benyamini; vahoolowaya ori nakupa a anamwane a mwene a oYuda nitho anamwane a mwene a oZebuloni ni oNafitali.

²⁸Ii! Muluku, moonihere ikurusanyu; Ii! Muluku, munoonihere oweraxawanyu ntoko mwaanipakenlaanyu.

²⁹Niwoko na Empaanyu eri oYerusaleemu, mamwene animooruuhelani soovaha.

³⁰Muhiihe enama yooluwa variyari wa etiili; mihuwo sa imombe ilopwana variyari wa aximombe a muloko. Yooyevihiweene enruuha mwithi wa eparatha*. Mmwaramwaxe miloko sintthunaxa ekhotto.

³¹Maneethi anrweela wExipitu; oKuxi onimutthimakela Muluku oolemeliweene soovaha.

³²Ii! Omwene wa elapo ya vathi, mmwiipele Muluku; mmwiipele Yave icipo soottottopela. Sela*

³³Mmwiipele Yoowo oneetta wiirimu, erimu ya khalayi. Owiriyane, Owo onkukutteya ni nsu nooweraxa.

³⁴Mulaleiye ikuru sa Muluku. Ovuwawawe ori wa oYixrayeli. Ikurusawe siri mmahutteni a osulusulu.

³⁵Ii! Muluku, Nyuwo ti oovuwihiwa vaNipuroniwanyu Nootteela*. Muluku a oYixrayeli omvaha mulokwaawe ikuru ni owera. Muluku atthapeliwe!