Read Makhuwa-Shirima Icipo 69 Bible Online

Icipo 69 - Makhuwa-Shirima bible

Icipo 69

¹Wa mutokweene a icipo, yiipiwa ettharihiwaka ecipo eniitthaniwa Ethutu. Ecipo ya Davide. Ii! Muluku, mukivuluxe, niwoko kihanle omireya.

²Miyo koodora muttokoni moowiixera; inawosaka khasinono woolipano. Koovolowa moowiixa ni miipili anookikumburula.

³Kookhulumuwaxa ovekela ekhavihero; wammiilo wookitthukana ni maithwaaka aakixeera engwehereraka vancipale Mulukwaaka.

⁴Yaale ankithanya woohinthowa ahaattaxa opwaha mayihi a mmurumwaka. Aani, ti ancipale ankikacamiha woohinthowa, yaale anaasaasa okiiva. Kinnyesererihiwa ohokoloxa kihiiyalaaka.

⁵Nyuwo Muluku munsuwela nnenesene ohikhalanawaka miruku; nthowanaka khanihiyono noovitheya wa Nyuwo.

⁶Ii! Yave, Yave a ikuru sootheene, yaale anoororomelani Nyuwo ehuulihiheye muru niwoko na miyo. Ii! Muluku a oYixrayeli, yaale angwaasani ehiyeviheye niwoko na miyo.

⁷Vano kooramusiwa niwoko na Nyuwo ni ekhovaaka yoosareya wuuliwa muru.

⁸Kiri namarwa wa axunnaka, mutthu oohisuwanyeya wa anamwane a amayaka.

⁹Nthiti kinkhalelaaka Empaanyu nookisareya ni oruwana wa yaale anooruwanani wookimorela.

¹⁰Miyo kiinlaka ni kitthukaka, nkinooneliwamo.

¹¹Kaawaraka sa othananela, atthu ankipaka mutheelelowaaya.

¹²Yaale ankilaathi vamulako ankuuluma ni kiri icipo sa anamawura.

¹³Vaheera kinimoovekelani Nyuwo, Yave, mweehuhuni yootthuneya. Ii! Muluku, moosivelanimwanyu otokotoko mukaakhuleke ni ovuluxawanyu woolipaxa.

¹⁴Mukoopole muttokoni weera kihimireye. Mukivuluxe mwa yaale ankithanya ni mmaahini moowiixa.

¹⁵Muhitthunihere weera miipili ekikumburule, naari weera moowiixera okimire, hata kihuuheeleleye mulittini.

¹⁶Mukaakhuleke Yave niwoko na osivelawanyu wooreera; mukhararinimwanyu sitokotoko mukiwehe.

¹⁷Muhimuhuluxere ekhovaanyu murumeiyaanyu; mukaakhuleke woowaakuveya niwoko koovalavelaxa.

¹⁸Mukaattameleke ni mukivuluxe; mukoopole mwa amwiittanaaka.

¹⁹Nyuwo moosuwela nnenesene otthebwiwawaka, oyevihiwa ni wuulihihiwa muru. Mohaasuwela amwiittanaaka ootheene.

²⁰Otheiwa wookiriipiha murima, nkinoona yooweera! Kaasaasa ikharari, mene nkiphwannye; kaahaadyoonttelela anamapepesa, mene khayaawoworu.

²¹Aahela yoowaawa muyoocanimwaka ni kaavoliwaaka ntthona, yaakivaha eviinyu yoonyuunya.

²²Meesa yaareherenraaya yaathatuwele muraakho, ikukuttula ni ntapha.

²³Mwaahele ewiriphi mmaithonimwaya weera ehiwere woona; mwaathukumelihe irutthusaya woohihiyerera.

²⁴Saamorele isarasanyu; onyoonyiwawanyu woopatta waaphwanye.

²⁵Mookonelamwaya oheleyemo nikare ni ahikhaleru anaakhale muheemanimwaya.

²⁶Vano awosa anaasoonda yaale Nyuwo munaavulalihaanyu ni antthekulela sa ovoreya wa yaale munaattaruxaanyu.

²⁷Mwaathorihele niwoko na soopakasaya soonanara; muhaatthunihere waakhela mpatta wa ororomeleyawanyu.

²⁸Awosa evenxiweke mulivuruni ya okumi, ehaalikeleliwe vamoha ni oororomeleya.

²⁹Othananawaka ni ovoreiwawaka ti otokotoko; Ii! Muluku, ovuluxawanyu okaakiheke!

³⁰Kinoottottopela Nsina na Muluku muciponi ni kinoomvuwiha ni icipo sootthapela.

³¹Eyo enoomuhakalalihaxa Yave opwaha yooveleela ya emombe elopwana naari napunci ni minyakasawe ni mapitaawe.

³²Oohaawa animoona yeeyo, enahakalala. Nyuwosa mummwaasa Muluku, mirimasanyu sikhaleke ni okumi!

³³Yave ongwiiwa atthu oohaawa ahiramusaka mulokwaawe wootthukiwa.

³⁴Elapo ya vathi ni erimu emuttottopeleke Yave vamoha ni ephareiya ni sootheene sirimo,

³⁵niwoko Yave onoovuluxa oSiyoni, onoorasela isidade sa oYuda. Vahoolowaya mulokwaawe onimwiitekihawo okuxaka elapo.

³⁶Anamwane a arumeiyaawe animwaakhela ntoko yoohiyeriwa ni yaale ansivela Nsinanawe anoomakamo.