Read Makhuwa-Shirima Icipo 7 Bible Online

Icipo 7 - Makhuwa-Shirima bible

Icipo 7

¹Ecipo eniipiwa ottharihiwaka moota wa exigayoni*. Davide aamwiipenle ela Yave mwaha wa Kuxi, muBenyamini. Ii! Yave Mulukwaaka, Nyuwo ti wootthawelawaka. Mukivuluxe ni mukoopole wa ootheene ankittharatthara

²weera ehikikhuure naari ehikinyaanye ntoko amwatto, ahikhalakaru ookivuluxa.

³Ii Yave, Mulukwaaka! Waari weera koopaka yeeyo kikhalakano nthowa;

⁴kaampakenleene yoonanara nthamwenaaka hata kaamwiiyenreene mwiittanaaka woohinthowa,

⁵vano mwiittanaaka akittharatthareke mpaka okiphwanya; akinyikalelase vathi mpaka okiiva, akiswanyaka. Sela*

⁶Ii! Yave mvenyeke musaranimwanyu! Mweemele muvirikanyihe owali otokotoko wa amwiittanaaka. Mvenye, Mulukwaaka! Mulamule weera ekhaikhai ekwaniheriwe!

⁷Sithukumane miloko mukhwipimwanyu. Mulamule mureene osulusulu.

⁸Yave athoriheke miloko. Mwaakhuleleke ohikhalanawaka nthowa ni osivelawaka ekhaikhai.

⁹Ii! Yave a ekhaikhai, Nyuwo munoona soowuupuwela ni mirima sa atthu ootheene, mmalihe nipuhero na atakhali ni mwaalipihe oororomeleya.

¹⁰Muluku a osulusulu ti yoowiixaakiheraaka; Yoowo onimuvuluxa mutthu a murima wa ekhaikhai.

¹¹Muluku ti Mphuki a ekhaikhai; Owo onnoonihera isarasawe khula nihuku.

¹²Mutthu aahitthuna orukunxa murimaawe, Muluku onnona ekatanaawe, anareherera muupaawe.

¹³Owo ooreherera ikapwitthisawe soowiiva ni nyuupasawe soovarela.

¹⁴Yoole onsareya soonanara ni onrupala sootakhala onyara soowootha.

¹⁵Yoole onthipa elakasa, aniixiha, onoomorela elakaseene yeeyo othimpaawe.

¹⁶Soonanarasawe sinoomuhokoleela; nipuheronawe nnoommorela muneenaawe.

¹⁷Kinoomutthapela Yave niwoko na ororomeleyawawe ni kinimwiipa icipo kittottopelaka Nsina na Yave a Musulusulu.