Read Makhuwa-Shirima Icipo 73 Bible Online

Icipo 73 - Makhuwa-Shirima bible

Icipo 73

¹Ecipo ya Asafi. Vekhaikhai Muluku ti ooreera murima wa oYixrayeli ni wa yaale ari ootteela murima.

²Vano wa miyo, inaawosaka saahanle vakhaani okakathuwa. Kaahanle vakhaani oserenguwa.

³Kaahaakhalela nrima oowiixoona koonnaaka siweettelaka nnene atakhali ale.

⁴Awosa khaanghaawa; irutthusaya siri salaama ni soolipasene.

⁵Khaanghaawa ni soovalaveliha sa okumi ntoko akina ni khaanghaawa ni iretta sa atthu akina.

⁶Tivawo wiixoona amvarela muteko wa yoowiiphwaneliha ni awosa aniiwariha nipuhero.

⁷Sootakhala sinkhuma mmirimanimwaya soowuuma; mmuupuwelonimwaya woosareya soovaanela soonanara.

⁸Awosa anderera yuulumaka ni moota woonanara; ngwiixoonanimwaya anoopopiha ni nihasu.

⁹Awosa anuulumela wiirimu moota woowiixoona ni malumaaya aniivahano elapo.

¹⁰Tivawo mulokwaaya onaarukunuwelaaya ewuraka maswaaya mpaka ovona.

¹¹Awosa aneera: “Muluku khansuwela yeela. Muluku a Musulusulu khoonelelaru.”

¹²Mweettelo wa atakhali ti ola: mahuku ootheene khaampwattha etthu yaandyeereraka mihakhusaya.

¹³Vekhaikhai khookivareleiye muteko okhalano murima wootteela ni okhalano matata ooreereene wa soonanara sootheene.

¹⁴Koohooxiwa mahuku ootheene ni khula oxeexelo kinnattaruxiwa.

¹⁵Miyo keenre: “Kuulumme ntoko awosa,” saano kaavarihaleene anamwaniinyu.

¹⁶Miyo keereraaka wiiwexexa sootheene iye, kaahoona weera sookirikela,

¹⁷mpaka kaavolongwaaka Nipuro Nootteela* na Muluku — vano kohiiwexexa ommaleloni wa atakhali ale.

¹⁸Vekhaikhai mungwiikaathi vanipuroni nootherera; mohaamoroxela mmathalani.

¹⁹Awosa amphwatiwa wootutuxereya; esareiyeene otteenguwa woomalela!

²⁰Ari ntoko oloha onlakaseya naavenyaka; Ii! Yave, mwaavenyaka, munimwaalakaseiha.

²¹Murimaaka waakiriipalaaya ni okumaaka waasareiyaaya nrima,

²²nkiiwexexa, kihisuwelakatho etthu. Vamaithoniwanyu kaari ntoko mwaamunama.

²³Hata hiiho miyo kinkhala ni Nyuwo mahuku ootheene; munkeettiha mukivarenleene moonowaaka woolopwana.

²⁴Munkihoolela ni mirukusanyu ni vahoolowaya munookaakhela moovuwanimwanyu.

²⁵Khawowo mukina kiraakano wiirimu muhikhanle Nyuwo. Mweelaponi kheewoworu kinghaawelaaka ohikhanle okhala ni Nyuwo.

²⁶Enoowereya erutthwaaka ni murimaaka olosowa, mene Muluku ti ikuru sa murimaaka ni yoohiyeriwaaka wa mahuku ootheene.

²⁷Moone, yaale yoohiyaleni anooriheya; Nyuwo munaaphwata oohiroromeleya ootheene.

²⁸Vaheera wa miyo ti wooreera okhala vakhiviru wa Muluku. Koomuthanla Yave onlamula sootheene ntoko Wootthawelawaka; kinoolaleiya mitekosanyu sootheene.