Read Makhuwa-Shirima Icipo 74 Bible Online

Icipo 74 - Makhuwa-Shirima bible

Icipo 74

¹Ya Asafi. Ecipo ya miruku. Ii! Muluku, munnikhoottela heeni wa mahuku ootheene? Simpattela heeni isarasanyu wa ikhondoolo sa muhuwaanyu?

²Muupuwelele mulokwaanyu, mwa yoowo mwaathummaanyu khalayi; epuumba ya yoohiyeraanyu, mwa yeele mooponlaanyu nitho mwaako oSiyoni mwaamankaanyuwo.

³Muhokoleele mathala ala oohiraseleya — ophwatiwa wootheene wu amwiittana aruuhenlaaya vaNipuroni Nootteela*.

⁴Amwiittanaanyu yaakhuwela oowineene vanipuroni mumphwanyaneyaanyuwo ni hiyo; yaathomeyaawo eneneerowaaya ya owina.

⁵Yaakhala ntoko asilopwana ekuxaleene ipaso mutorosoni mootthavelana ehekulaka.

⁶Yaakakatthanya ni ipasosaya soohiyanahiyana soopakiwa sooreera sa itthaabwa.

⁷Yaahisa vaNipuroniwanyu Nootteela* woomalela; yaanyoowiha nipuro nimmakaaya Nsinananyu.

⁸Yaaheera mmirimanimwaya: “Nrowe naahasule ootheene moota woovihaxa.” Yaahisa mapuro ootteela ootheene a mulaponi aalapiwaawemo Muluku.

⁹Khanivahiwatho ineneero sootikhiniheya; khaawoworu maprofeeti ni khaawo a hiyo osuwenle omalawaya.

¹⁰Ii! Muluku, mpaka yaakhani amwiittana eneeraaya yootheyeeni? Weeraka awosa anooderera Nsinananyu wa mahuku ootheene?

¹¹Heeni musungaanyu ntatananyu noolopwana nooweraxa? Muhiikhuraanetho — mwaaphwate!

¹²Vaheera Nyuwo Muluku ti Mwenaaka okhuma khalayi. Nyuwo munruuhela ovuluxa mweelaponi.

¹³Ti Nyuwo mwaakawanyinghe ephareiya ni ikurusanyu; mwaanyakatta nyuru sa inama soowoopihaxa sa mphareiyani.

¹⁴Ti Nyuwo mwaanyakantte muru wa Levitiyani*, munavaha soopattuxiwa sa munikareni weera sikhuureke.

¹⁵Ti Nyuwo mwaahunle anaattuuttu ni iphattuwela, mene mwaahuumiha nyooloko sitokweene.

¹⁶Othana ti wawinyu ni hiihotho ohiyu; Nyuwo moopattuxa nsuwa ni mweeri.

¹⁷Ti Nyuwo mwaakhalinghe nyiinano sootheene sa elapo ya vathi; moopaka elimwe ni eyiita.

¹⁸Ii! Yave, muupuwelele moota amwiittana yootheiyaayani ni moota alolo atthembwaaya Nsinananyu.

¹⁹Muhinnyerere okumi wa ekhundaanyu wa axinama a ntuphini; muhittiwale mahuku ootheene okumi wa mulokwaanyu woohasuliwa.

²⁰Muupuwelele wiiraanawanyu, niwoko ilapo sootheene soosareya mapuhero.

²¹Muhaahiyeke oohasuliwa ehokolowaka oowuulihiheyeene muru; atthu oohaawa ni oothoiwa ettottopeleke Nsinananyu.

²²Ii! Muluku, mvenyeke ni mwaakihe Nsinananyu; muupuwelele moota alolo yootheiyaayani woohihiyerera.

²³Muhittiwale okhuwela wa amwiittanaanyu; munyakunyaku wa yaale anoothanyani.