Read Makhuwa-Shirima Icipo 77 Bible Online

Icipo 77 - Makhuwa-Shirima bible

Icipo 77

¹Wa muhusiha a icipo. Ecipo entthara moota woowiipa oniitthaniwa “Yedutuni.” Ecipo ya Asafi. Kinimukhuwelela Muluku ekhavihero; kinimukhuwelela Yoowo weera akiiwe.

²Kaathananaaka, kaamwaasa Yave; ohiyu kannatheteya matata woohihiyerera, mene okumaaka khawaamoona oopepesa.

³Ii! Muluku, kaawuupuwelelani Nyuwo, kinahihimera; kaatthokelela ni okumaaka waavolola.

⁴Khamwaakitthunihenre oputiha; kaari ootthukuruwaxa, kihiweraka wuuluma ni Nyuwo.

⁵Kaahuupuwela sa mahuku avinre ni sa ihuhu sa khalayi.

⁶Kinuupuwelela iciposaka kiipalaaka ohiyu; murimaaka waatthokelela ni okumaaka wannakoha:

⁷“Yave onoonikhootta mahuku ootheene? Owo kharwatho anoonihera murimaawe wooreera?

⁸Osivelawawe woomala khuluwi? Soororomelihasawe soomala?

⁹Muluku oottiwala omoriwawawe ikharari? Musaranimwawe onghiiha murimaawe wooreera?” Sela*

¹⁰Vano kaahuupuwela: “Kinghaawa niwoko ntata na Muluku a Musulusulu khanimvaratho muteko.

¹¹Kinimuupuwelela miteko sa Yave, aani kinimuupuwelela sootikhinihasanyu sa khalayi.

¹²Kinootthokelela mitekosanyu sootheene, kuupuwelaka sootikhinihasanyu sootheene.”

¹³Ii! Muluku, iphirosanyu ti sootteela. Khawoworu muluku mukina ahikhanle Mulukwaahu.

¹⁴Nyuwo ti Muluku ompaka sootikhiniha; Nyuwo munoonihera ikurusanyu variyari wa miloko.

¹⁵Mohoopola mulokwaanyu ni moonowaanyu wooweraxa — ikhapira sa Yakobe ni Yoseefe. Sela*

¹⁶Ii! Muluku, maahi yaawoonani, yaawoonani, enaasareya owali; mpaka moowiixera waatetereya ni woova.

¹⁷Mahutte yaarupiha epulaaya; woopa wa etari waaruma wiirimu; overunyawanyu waahooneya mipatta sootheene.

¹⁸Etaraanyu yaahiiwiwa muyuupuruni; overunyawanyu waamwaleela elapo ni etthaya yaatetereya vancipalexa.

¹⁹Ephirowaanyu yaavira mphareiyani; musewaanyu mmaahini mmaahini, ni khaawo oonne mwaanyikalaanyumo.

²⁰Mwaahoolela mulokwaanyu ntoko muhuwo mmatatani mwa Moisesi ni Aharoni.