Read Makhuwa-Shirima Icipo 81 Bible Online

Icipo 81 - Makhuwa-Shirima bible

Icipo 81

¹Wa mutokweene a icipo. Yiipiwa ottharihiwaka moota woowiipa oniitthaniwa Gititi*. Ecipo ya Asafi. Mmwiipele oohakalaleene Muluku ori ikurusahu; munkhuwelele ni nsu ntokotoko Muluku a Yakobe!

²Mpacereke icipo, mwaarumihe akarakaxa vamoha ni makita ni lira* moorattani.

³Mwiipele nipalapatta wooneya wa mweeri munyowani ni wa mweeri woowunnuwa, vanihukuni na efestaahu.

⁴Eyo ti ekano wa aYixrayeli; otthuna wa Muluku a Yakobe,

⁵mwa yeeyo aakhalinghaawe ntoko ekano wa Yakobe owo aawanannaaweno wExipitu. Iwe naahiiwawo nuulumo nahaasuwenlaahu.

⁶Owo aaheera: “Kaahaarula murindi yaathatenlaaya; matataaya aatapuxeya wa soolemela.

⁷Moothanananimwanyu mwaahiitthana ni kaawoopolani, kaawaakhulani mookukutteyani wa mmahutteni; kaawootani murima mmaahini a oMeriba. Sela*

⁸Ii! Mulokwaaka, mwiiwe ni kinoowoopererani; ii! oYixrayeli, kaatthunaxa weera mukiiwelele!

⁹Muhikhalenoru miluku sikina variyariwanyu; muhikokhoreleru miluku sa amalapo.

¹⁰Miyo ti Yave Mulukwaanyu, mwa Yoowo ookhumihaleni wExipitu. Mwaathame ni kinimoocihani.

¹¹Wa soothesene, mulokwaaka khawaatthuna okiiwa, aYixrayeli yaakhootta okiiwelela.

¹²Tivawo kiinnyerenraaka mirimasaya soowuuma weera etthare soovaanelasaya.

¹³Mano mulokwaaka waakiiwale, aYixrayeli yeettenle ephirowaaka,

¹⁴woowaakuveya Miyo kaamwaayeviha amwiittanaaya ni kaamwaattaruxa awananaaya.

¹⁵Mwaha wa yeeyo, yaale animuthanya Yave yaamweemexa matata ohoolowaka ni yaamwaakhela nttaruxo noohimala.

¹⁶Vaheera Miyo kaamwaaciha aYixrayeli ni etrigu yooreerelaxa ni kaamwaavoniha ni oravo woowaavuliwa vamwala.”