Read Makhuwa-Shirima Icipo 84 Bible Online

Icipo 84 - Makhuwa-Shirima bible

Icipo 84

¹Wa mutokweene a icipo. Yiipiwa ottharihiwaka moota woowiipa oniitthaniwa Gititi*. Ecipo ya anamwane a Kora. Ii! Yave a ikuru sootheene, moota nireenraaya nipuro munkhalaanyu!

²Okumaaka onghaawelaxa mapuwa a Yave; murimaaka ni erutthwaaka emmwiipela ni ohakalala Muluku Mukumi.

³Mpaka cirikhu oophwanya wookhalawo ni meenkesa onreherera epuurwaawe vakhiviru wa altaaraanyu mwa weiwo onaahuwaawewo axaanaawe, Yave a ikuru sootheene, Mwenaaka ni Mulukwaaka.

⁴Ooreelihiwa ti yaale ammaka vaatewanyu; awosa anoottottopelani Nyuwo woohihiyerera. Sela*

⁵Ooreelihiwa ti yaale amphwanya ikurusaya mwa Nyuwo; yaale anrowa wa Empaanyu ekhumaka ottaiwene!

⁶Awosa yaaviraka nreyareya na oBahaka, antatuxa nipuro noosareya anaattuuttu; epula mutthulotho ensariha matthiyaaya.

⁷Awosa anrowa saandyeerereyaka ikurusaya mpaka khula mutthu a yaale wiixoonihera ohoolo wa Muluku oSiyoni.

⁸Ii! Yave Muluku a ikuru sootheene, mwiiwe nivekelonaka; Ii! Muluku a Yakobe, mukiiwe! Sela*

⁹Ii! Muluku, ngwehe exikudwaahu; mmoonihere murimaanyu wooreera oottikittheliwaanyu.

¹⁰Fataari okhala nihuku nimoha mmapuwanimwanyu ohikhanle mahuku macira muloko nakhalaru nipuro nikina. Kookupaleela okhala namalipelela a mulako wa Empa ya Mulukwaaka ohikhanle okhala mmaheemani sa atakhali.

¹¹Vano Yave Muluku ti Nsuwa ni Exikudu*; Yave onoonihera murima wooreera ni nttittimiho; khanaakhoottelaru mpuha yaale aneetta moota wookwanela.

¹²Ii! Yave a ikuru sootheene! Ooreelihiwa ti yoole onoororomelani Nyuwo.