Read Makhuwa-Shirima Icipo 85 Bible Online

Icipo 85 - Makhuwa-Shirima bible

Icipo 85

¹Wa muhusiha a icipo. Ecipo ya anamwane a Kora. Ii! Yave. Mohoonihera murimaanyu wooreera wa elapwaanyu; mooreherera weetteleya nnene oYixrayeli.

²Moolevelela sootakhala sootheene sa mulokwaanyu ni mookhuneela sootthekasaya sootheene.

³Moohiya isarasanyu sootheene ni moosusa wa onyoonyiwawanyu woowoopiha.

⁴Ii! Muluku Mvuluxaahu, munirehereretho ni mmaalihe oninyoonyeriwawanyu.

⁵Munooninyoonyeriwa mahuku ootheene? Isarasanyu sinoopwaherera wa ikhapira sootheene?

⁶Dyoontte, muniirehereratho weera mulokwaanyu woohakalaleleni Nyuwo.

⁷Ii! Yave, munoonihere osivelawanyu woohimala ni munivahe ovuluxawanyu.

⁸Kinimwiiwa yeeyo Yave Muluku ohimmaawe. Owo onroromeliha murettele wa mulokwaawe; wa oororomeleyaawe. Awosa ehihokoleele iphiro soololo!

⁹Vekhaikhai ovuluxawawe ori vakhiviru wa yaale animoova ni ovuwawawe onookhala mweelaponimwahu.

¹⁰Osivela ni ororomeleya onookumanela; ekhaikhai ni murettele sinoobeecana.

¹¹Ororomeleya onoophuwa vathi ni ekhaikhai enooweha wiirimu.

¹²Vekhaikhai, Yave onoovaha yeeyo eri yooreera ni elapwaahu enooruwera soohephasaya.

¹³Ekhaikhai enrowa ohoolowawe, enareherera ephiro ya malipaawe.