Read Makhuwa-Shirima Icipo 86 Bible Online

Icipo 86 - Makhuwa-Shirima bible

Icipo 86

¹Nivekelo na Davide. Ii! Yave mwiiwe ni mukaakhuleke niwoko miyo ti oohaawa ni oothoiwa.

²Mwaakihe okumaaka niwoko kinoottharani moota woororomeleya. Nyuwo ti Mulukwaaka; mumvuluxe murumeiyaanyu onoororomelani Nyuwo.

³Ii! Yave, mukimorele ikharari, niwoko kinookhuwelelani ehuhu yootheene.

⁴Munghakalalihe murumeiyaanyu niwoko wa Nyuwo, Yave, kinimwinnyerera okumaaka.

⁵Ii! Yave, Nyuwo ti oolikaneene olevelela ni a murima wooreera. Nyuwo moosareya mahala wa ootheene angwiitthanani.

⁶Ii! Yave mwiiwe nivekelonaka; mwaakhulele okhuwelelawaka ikharari.

⁷Vanihukuni na othananawaka kinimookhuwelelani niwoko Nyuwo munookaakhula.

⁸Yave, khasiwoworu miluku soowoolikanxerani; mitekosanyu ti soohilikanxereya.

⁹Miloko sootheene mpattunxaanyu sinoorowa weera silape ohoolowanyu; Ii! Yave seiyo sinoovuwiha Nsinananyu,

¹⁰niwoko Nyuwo ti Mutokweenexa mpakaka miteko sootikhiniha; Nyuwo paahi ti Muluku!

¹¹Ii! Yave, mukixuttihe iphirosanyu weera keette mweekhaikhaiyinimwaanyu; mukivahe murima woororomeleyaxa weera koove Nsinananyu.

¹²Ii! Yave Mulukwaaka, kinimoottottopelani ni murimaaka wootheene; kinoovuwiha Nsinananyu wa mahuku ootheene.

¹³Vano okisivelawanyu ti otokotoko; mookivuluxa mookhwaani moowiixera.

¹⁴Ii! Muluku, atthu oowiixoona annakiwanano; nakupa a anamapuhera anaasa okumaaka — atthu ahinoopwatthani Nyuwo.

¹⁵Vaheera Nyuwo, Yave, ti Muluku a ikharari ni a murima wooreeraxa, oopisa onyoonyiwa ni oosareya osivela ni ororomeleya.

¹⁶Mukiwehe ni mukimorele ikharari; mumvahe murumeiyaanyu ikurusanyu ni mumvuluxe mwaana mulopwana a murumeiyaanyu muthiyana.

¹⁷Mukivahe eneneero ya oreerawanyu murima weera amwiittanaaka yoone yeeyo ni eyevihiwe, niwoko Nyuwo, Yave, mookikhavihera ni mookipepesa.